O bipartito, o gran argumento de Feijóo para desarmar á oposición
O presidente galego insiste na situación de "mellora económica" de Galicia e pide acordos pero sen ofrecer nada a cambio. PSdeG, AGE e BNG denuncian a degradación dos servizos públicos e a o aumento do paro e acusan a Feijóo de mentir sobre a situación real do país.
- A Galicia en negro da oposición
- Feijóo describe unha Galicia idílica que xa se está recuperando da crise
Por Xurxo Salgado | Compostela | 15/10/2013 | Actualizada ás 22:08
Cinco e dous. Son os anos nos que leva gobernando o PP en Galicia e en España. E aínda así, despois do tempo transcurrido, Alberto Núñez Feijóo, ten que tirar de datos do que aconteceu entón, con gobernos do PSdeG e BNG en Galicia e do PSOE en Madrid, para desarmar os argumentos da oposición.
"O bipatito gastou menos en sanidade e en comedores escolares, foi o responsable do concurso eólico, tivo máis parados no seu último ano que agora, subiu os impostos, eliminou o patrimonio das rendas altas, inxectou máis cartos á TVG"... Estes e outros máis foron os argumentos utilizados polo xefe do Executivo galego, Alberto Núñez Feijóo, ao lembrar ao Goberno que Emilio Pérez Touriño presidiu hai nove anos.
Pero non só o bipartito foi recurrente no discurso polo xefe do Executivo galego para facer fronte aos argumentos de PSdeG, AGE e BNG. Tamén botou man do de Zapatero, que comezou a súa presidencia hai seis anos. Así, aludiu aos 15.000 millóns "gastados en aceras" ou os 6.000 milllóns "en chegues bebés". "Que ben me virían a min agora eses cartos mal gastados", suliñou.
E é que a principal baza de Feijóo nos grandes debates galegos segue sendo a comparación de datos interesada entre os seus executivos e o bipartito. E con eses datos tentou desacreditar aos aportados pola oposición. E cando os líderes da oposición lle lembraron que todos os indicadores din que Galicia está peor que hai cinco anos, o xefe de Executivo buscou un novo argumento; a das urnas.
O "exame" dos galegos
"Fai un ano xa me examinaron os galegos e deronme a maioría absoluta novamente", indicou. "Non se pode comparar o 2005 co 2009... Mudaron as circunstancias pero se vostede fora membro da Xunta faría algunhas das cousas que eu estou facendo agora", dixo tamén durante o debate en resposta a unha crítica do nacionalista Francisco Jorquera.
Por suposto, tampouco coincidiron neste debate do Estado do País os datos e cifras utilizadas por Feijóo e as utilizadas polos líderes da oposición ao referirse á situación de Galicia. Na Galicia idílica de Feijóo, esa que "está mellor que o resto das autonomías" e a punto de "saír da crise", o paro rexistrado baixou en 18.000 persoas ata setembro, que a débeda é a menor que a do conxunto de España e que a xente non emigra nas porcentaxes que denuncia a oposición.
Para un caso utilizou datos do Instituto Nacional de Estatística e outros os da oficina públicas de emprego, mentres que a oposción aludía tamén a datos do INE, da EPA ou mesmo de Cáritas. "Se eu chego a utilizar os datos de Cáritas xa me estarían criticando. Eu cito as estatísticas do Estado e de Galicia", dixo ao xustificar a súa radiografía do país.
As explicacións de Feijóo
E sobre os argumentos e críticas da oposición sobre a situación real de Galicia, que dixo o presidente da Xunta?. Sobre os problemas das pensións dos emigrantes retornados apuntou que Galicia "non dará un paso atrás" neste asunto. "E se a Axencia Tributaria non o fai, terá a Xunta en contra", insistiu.
En relación ao naval dixo que é outra das "prioridades" da Xunta pero responsabilizou ao PSOE de ser o responsable do peche dos asteleiros galegos a través do comisario europeo Joaquín Almunia. "O naval foi unha carreira de obstáculos por culpa de Almunia e do lobbie holandés", afirmou.
Sobre exemplaridade na política dixo que no seu goberno non hai "ningúen imputado" e ningún membro do seu executivo "nun sumario", sen decartarse de que o delegado do Goberno galego en Ourense, Rogelio Martínez, --presente na tribuna dos convidados-- está imputado nun proceso xudicial. "Alá cada quen co que ten", afirmou con respecto a outros casos que afectan ao seu partido, especialmente, no concello de Santiago.
No caso das caixas, defendeu a súa venda e queixouse da "pouca información" que o bipartito tiña sobre a situación económica das caixas tras a "alerta" que recibiu do Gobernador do Banco de España cando chegou á Xunta en 2009.
Pero as explicacións de Feijóo -utilizando ao bipartito ou enquisas diversas-- non convenceron á oposición que volveu criticar a "pésima situación económica" na que se atopa Galicia; con máis paro, máis emigración, sen sectores productivos, sen carga de traballo no naval ou con explotacións agrarias que pechan cada día.
E aínda así, o presidente galego insistiu en chegar a posibles acordos cos tres grupos. Un acordo que foi rexeitado, precisamente, porque Feijóo evitou comprometerse durante o seu discurso con algunhas das propostas realizadas por PSdeG, AGE ou BNG para diminuir o paro, mellorar os servizos públicos ou evitar a emigración dos máis novos, entre outras.
As "provocacións" a Beiras
Durante este debate, o líder de AGE acusou a Feijóo de tentar "provocalo" apelando a "argumentos de índole persoal". E é o xefe do Executivo galego aludiu en varias ocasións a orixe burguesa de Beiras ou as súas críticas as xubilacións en sanidade "polos amigos que un pode ter aí".
"Saiu para provocarme porque só me deixo provocar cando quero e me interesa e porque non quero abusar de vostede", ironizou Beiras que dixo que lle podería aplicar os "adxetivos" que Pondal utiliza no himno galego, 'Os pinos', pero non o faría porque "dirían que o estou insultando". Así, ironizou co "nivel cultural" de Feijóo e dixo que "só aprendeu o Código civil" cando estudiaba.
"Non quero que nadie acabe en Urxencia", replicoulle logo Feijóo. "Eu teño educación. E se alguén pensa que citando á cultura, outro non pode ter educación, equivocase profundamente", dixo al lembrar que aprendeu "moito" das súa "orixes". "Se tivera as mesmas ca min pois vería as cousas de xeito diferente", concluíu.
