Por E.P. | SANTIAGO DE COMPOSTELA | 09/05/2021 | Actualizada ás 14:08
A Xunta chamou a preservar "o espírito fundacional da Unión Europea" para "refacer os alicerces da súa prosperidade" e construír o futuro "ambicioso" que o territorio "merece" ante os "difíciles momentos" vividos tras a propagación da pandemia da covid-19 e a saída do Reino Unido.
Nunha declaración institucional difundida este domingo con motivo do Día de Europa, o Goberno galego destacou que Europa se atopa "ancorada firmemente" nos seus valores fundacionais, que identificou como "garantes da liberdade", a "pluralidade", a "solidariedade" e o "progreso", e que afirmou que "debe preservar e continuar promovendo" en "estes difíciles momentos".
Neste sentido, chamou a "aferrarse ao espírito fundacional da Unión Europea" para "refacer os alicerces da súa prosperidade" e "rexurdir coa maior calidade de vida para toda a cidadanía". "Se algo aprendemos da situación que estamos a vivir é que só traballando xuntos poderemos construír un futuro tan ambicioso como o que hoxe se nos presenta e que o territorio europeo merece", defendeu o Executivo que preside Alberto Núñez Feijóo.
Nesta liña, lembrou que o Día de Europa estivo marcado polo arranque da Conferencia sobre o Futuro da Unión, que permitirá abordar a reforma do proxecto europeo e a súa renovación. Así, afirmou que representa unha "oportunidade única" para implicar á cidadanía no deseño dunha UE que permita enfrontarse "aos retos reais das persoas, os cambios sociais e económicos por vir e os desafíos tecnolóxicos, dixitais e climáticos do futuro".
O Goberno galego tamén valorou a aprobación dos fondos 'Next Generation EU', un "paquete de estímulo económico" destinado a "reconstruír unha Europa posterior ao coronavirus máis cohesionada, xusta, ecolóxica e social". Deste xeito, a Xunta de Galicia afirmou que a Administración autonómica atópase "implicada e comprometida" na captación de fondos e preparación de proxectos que consoliden "unha Galicia economicamente máis competitiva e socialmente máis igualitaria" xunto cos principais actores económicos e sociais da comunidade autónoma.
Así mesmo, o Executivo autonómico reivindicou o Camiño de Santiago como o "símbolo da convivencia armoniosa da diversidade cultural que caracteriza á Unión" nun ano no que se celebra o Xacobeo e afirmou que na ruta "atópanse reflectidos todos os valores que inspiran o proxecto europeo".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.