A Xunta incoará este mes a declaración BIC da Casa Cornide e pide ao Estado que lle habilite para ampliar a de Meirás

O conselleiro de Cultura, Educación e Universidade, Román Rodríguez, anunciou este mércores que a Xunta incoará este mesmo mes o expediente da declaración como Ben de Interese Cultural (BIC) da Casa Cornide, na Coruña, cumprindo así o compromiso adquirido.

Así o anunciou no pleno da Cámara galega, onde o conselleiro deu resposta a senllas preguntas do BNG e do PSdeG sobre a ampliación da declaración BIC dos mobles do Pazo de Meirás. Segundo indicou Román Rodríguez, a declaración BIC da Casa Cornide garantirá a protección integral dos seus valores culturais desde o mesmo momento da incoación e ata a aprobación definitiva, adoptando as medidas que sexan necesarias para garantilo.

A decisión da Dirección Xeral de Patrimonio Cultural conta cos informes favorables das tres institucións consultadas na tramitación: o Consello da Cultura Galega (CCG), a Real Academia Galega (RAG) e a Universidade de Santiago de Compostela (USC).

PAZO DE MEIRÁS

Por outro lado, o conselleiro criticou que o Goberno central non exerza as súas competencias para a ampliación da declaración como Ben de Interese Cultural (BIC) do Pazo de Meirás nin respondese na última semana ao convenio de colaboración proposto pola Xunta para habilitala a adoptar esta medida.

Román Rodríguez asegurou que a Xunta entende que debe ser o Estado o que faga esta tramitación tendo en conta que "son os donos". "A Lei de patrimonio nacional di que quen é competente para incoar o BIC é o Estado", sinalou o conselleiro.

Sostivo que a Xunta "está a absoluta disposición" e "non ten ningún inconveniente para ampliar a declaración BIC". "Pero ten que estar habilitada, para o que expomos un convenio e remitímolo ao Estado", sinalou para advertir de que, de non existir ese acordo, a acción de protección BIC "entraría nun corredor sen saída".

En fronte, tanto BNG como PSdeG urxiron á Xunta a actuar e a deixar de "escudarse" no Estado. Deste xeito, en primeiro lugar, o deputado do Bloque Luís Bará criticou que trate de "pasarlle a pelota" ao Goberno central.

O nacionalista dixo que o Goberno galego ten competencias en patrimonio histórico para incoar o expediente, que conta co aval da Avogacía do Estado e que "non é a primeira vez que unha comunidade fai unha declaración BIC". "Fágano xa e non poñan máis escusas", apuntou.

Pola súa banda, o parlamentario socialista Pablo Arangüena tamén apremou á Xunta a ampliar esta declaración. Así, sostivo que a Administración autonómica ten competencia exclusivas sobre o patrimonio cultural de Galicia, ademais de que foi a Xunta a que declarou BIC o inmoble en 2008 a iniciativa do Goberno presidido polo socialista Emilio Pérez Touriño. "Parece coherente que sexa de novo a Xunta quen estenda a declaración aos bens incluídos no Pazo", apuntou.