"Igual que apareceu esta pandemia sen saber como nin porqué pode aparecer outra"

O doutor en Socioloxía pola Universidade de Harvard Víctor Pérez Díaz subliñou este xoves no Foro IESIDE de ociedad e economía, retransmitido en directo en Afundación TV, que o único medio posible para afrontar e saír da crise provocada pola pandemia é "unha cidadanía sostida e activa".

"O xogo estratéxico que temos por diante non se pode delegar a un terceiro pseudodivino ou a que veña o partido milagroso, a cidadanía debe saír dunha situación de submisión, de eu estou na miña casa como nunha gaiola, illada. É importante compartir entre todos visións e experiencias", proclamou.

Doutor en Socioloxía pola Universidade de Harvard, doutor en Dereito e doutor en Ciencias Políticas pola Universidade Complutense de Madrid, e membro da American Academy of Arts and Sciences e da Academia Europea, explorou na súa conferencia algúns aspectos da crise actual e o contraste en Europa e España e a que considera "limitada capacidade estratéxica" destas comunidades para facerlle fronte.

"Europa ten un percorrido complicado nos últimos 30 anos, ao que se engade o fenómeno do Brexit, e no medio de todo isto chega a pandemia, sumar e complícase con grandes retos sociais, económicos e políticos", relatou, antes de engadir que non se pode pensar que as vacinas darán a solución.

"Iso é só unha parte do xogo. Igual que apareceu esta pandemia sen saber como nin porqué pode aparecer outra. A vida continúa co risco incorporado. Tras isto temos que aprender algo, igual que aprendemos os riscos da guerra atómica. Todo isto son cousas que temos que incorporar á dixestión", argumentou.

Por este motivo, en opinión do experto, "hai que tomar decisións, construír comunidades capaces de enfrontarse aos retos, atreverse a pensar que temos que construír algo en comunidade porque temos que salvarnos e vivir xuntos".

TRAXECTORIA

Presidente de Analistas Socio-Políticos, un centro de investigación en ciencias sociais, dedicado a estudos de socioloxía política, cultural e económica, con especial atención a España e Europa, Víctor Pérez foi catedrático de Socioloxía da Universidade Complutense de Madrid, así como profesor visitante da Universidade de Harvard, do MIT, da Universidade de California (San Diego), da Universidade de Nova York, e da New School for Social Research de Nova York.

Tamén foi fellow do Institute for Advanced Study de Princeton, profesor do Centro de Estudos Sociais de Berlín, do Instituto de Ciencias Políticas de París e director asociado na École deas Hautes Études en Sciences Sociais de París.