Por Europa Press / Redacción | SANTIAGO DE COMPOSTELA | 12/07/2021 | Actualizada ás 16:15
A área sanitaria de Ourense continúa sen pacientes ingresados pola Covid-19 en UCI tras detectarse un falso positivo, confirmaron fontes sanitarias.
O incremento de casos activos de Covid-19 na área sanitaria de Ourense, Verín e O Barco de Valdeorras aproxímase ao milleiro. O xerente da área sanitaria, Félix Rubial, advirte de que hai "preocupación" pola "tendencia explosiva no número de casos".
Así, alertou de que a repercusión, no ámbito asistencial, "está a ser pequena" debido á media de idade dos contagios, pero trasladaba que, despois de 15 días sen casos en críticos, había un paciente na UCI do Complexo Hospitalario Universitario de Ourense.
Agora, por parte da área sanitaria, comunicaron que foi dun falso positivo e que a unidade de coidados intensivos continúa sen casos activos. Tratouse dun paciente ingresado na planta por outros motivos e que ao realizar a proba arroxou un positivo que nunha nova proba resultou falso.
Deste xeito o Complexo Hospitalario Universitario de Ourense conta con 10 persoas hospitalizadas por Covid-19 en planta e a unidade de coidados intensivos libre deste coronavirus.
INCIDENCIA NOS MAIORES DE 60 ANOS
Con todo, por parte da área Sanitaria advirten de que a incidencia entre 16 e 29 anos aumentou pasando de representar o 51,4% dos casos a un 59,2%.
Por tramo de idade, o 7,8% dos casos son menores de 15 anos, un grupo etario no que se reduce a incidencia con respecto á semana anterior, do mesmo xeito que no grupo de entre 40 e 59 anos que pasa do 18 % da semana pasada ao 11,5% esta.
Pero por parte do CHUO avisan de que a "preocupación" está no aumento da porcentaxe de casos entre os maiores de 60 anos que pasa a ocupar un 4,6% da total fronte ao 3,6 da semana pasada.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.