A investigación polo crime de Samuel na Coruña suma xa 26 probas testificais
O delegado do Goberno remarca que "os presuntos autores" están en mans da xustiza, pero non descarta novas detencións
Por Europa Press / Redacción | SANTIAGO DE COMPOSTELA | 14/07/2021 | Actualizada ás 16:41
O delegado do Goberno en Galicia, José Miñones, revelou este mércores que, no marco da investigación polo crime de Samuel Luiz na Coruña, que segue aberta e na que non se descartan novas detencións, suma xa 26 probas testificais.
Así o trasladou, en declaracións aos medios durante unha visita a Miño, Miñones manifestou que espera que "nas próximas horas", mediante o visionado das cámaras e o envorcado de imaxes dos teléfonos móbiles, "se acheguen novas probas" e se poida pechar "da mellor maneira" a investigación en curso.
Miñones concretou que mentres que estea aberta non se descartan novas detencións e precisou que as 26 testificais engloban as declaracións efectuadas desde a súa posta en marcha e inclúen as do seis detidos. En todo caso caso, insistiu en que "os principais sospeitosos e presuntos autores foron postos ante a xustiza".
En concreto, ata o momento, hai un total de seis detidos, dos que tres permanecen en prisión, unha moza foi posta en liberdade, e os outros dous, menores de idade, internados nun centro.
SEGUE O SEGREDO DE SUMARIO
Nas súas declaracións, o delegado do Goberno confirmou que non se levantou o segredo de sumario por que a Fiscalía presentou un recurso. Así as cousas, rexeitou dar detalles máis específicos sobre obxectos localizados en rexistros ou outro tipo de cuestións máis concretas.
