Sindicatos e empresarios de Ferrolterra piden a Miñones que intermedie para conseguir unha reunión co Goberno

Sindicatos e patronais de Ferrolterra, Eume e Ortegal acordaron remitir un escrito conxunto ao delegado do Goberno en Galicia, José Miñones, para pedirlle que intermedie para conseguir unha reunión coa vicepresidenta primeira do Executivo, Nadia Calviño, e a ministra de Industria, Comercio e Turismo, Reyes Maroto, na que abordar a "severidade da emerxencia industrial" nestas comarcas.

En concreto, asinan a carta o tres organizacións maioritarias (CIG, UGT e CC.OO.), a Asociación de Empresarios de Ferrolterra, a Confederación de Empresarios de Ferrol, Eume e Ortegal, e a Asociación de Empresas do Sector Naval Público.

A través dun comunicado, os asinantes urxen a Miñones que nunha próxima reunión --aínda queda por fixar a data-- debe "saír un calendario concreto de citas" con Calviño e Maroto para abordar as "cuestións urxentes" nas que ambas as ministras teñen responsabilidades e competencias directas.

Ademais, os sindicalistas Manuel Anxo Grandal (CIG), José Antonio Díaz (UGT) e José Furtado Amador (CC.OO.) redactaron tres cartas dirixidas a ambas as ministras e ao vicepresidente económico da Xunta, Francisco Conde, respectivamente, nas que expoñen un "diagnóstico coincidente" da situación de Ferrolterra froito das reunións mantidas con representantes de distintos grupos políticos --PSOE, PP, BNG, Esquerda Unida e Podemos--.

"Acordamos unir forzas e priorizar diversas actuacións que consideramos vitais para a supervivencia da nosa comarca, é dicir, dos territorios dos máis de 20 municipios que conforman Ferrol, Eume e Ortegal", sinalan os asinantes.

O delegado do Goberno, José Miñones, e o reitor da Universidade de Vigo, Manuel Reigosa, conversan antes de manter unha reunión