Por E.P. | SANTIAGO DE COMPOSTELA | 22/07/2021 | Actualizada ás 19:33
O Goberno galego acordou incrementar o crédito inicial destinado a ampliar a extensión da rede de 'casas do maior' neste ano 2021. Segundo informou o presidente da Xunta, Alberto Núñez Feijóo, tras a reunión semanal do seu Executivo, poderase quintuplicar o seu alcance ao pasar dos 20 centros postos en marcha na actualidade a máis de 100.
Dar este paso implica aumentar os fondos ata os 6,2 millóns de euros, é dicir, cinco veces máis que na primeira edición do programa. A Xunta ratificou que se manteñen as novidades que amplían o perfil do usuario, que xa non deberá ter grao I ou II de dependencia, senón que poderá ser calquera maior autónomo. Os promotores poderán prestar servizos de desprazamento desde e cara a estes centros, para o que a Xunta ofrece axudas de 5 euros por persoa e día.
VIVENDA PROTEXIDA
Por outra banda, a Xunta informou de que convoca as axudas para a adquisición de vivendas protexidas con incentivos de ata 20.000 euros por inmoble. Esta liña de subvencións é unha das medidas recollidas no 'Pacto social pola vivenda' e a convocatoria para este ano, que publicará este venres o Diario Oficial de Galicia (DOG), ten un orzamento de 450.000 euros.
Poderá subvencionarse a compra de vivendas de réxime xeral ou especial de nova construción ou procedentes da rehabilitación. Finalmente, o Executivo autonómico informou de que se contratarán 45 novas prazas públicas para persoas con discapacidade intelectual na Residencia de Baños de Molgas. O contrato, que terá unha duración inicial dun ano prorrogable ata un máximo de cinco, contará cun orzamento total de 8 millóns de euros.
POLO AEROESPACIAL
O Goberno galego acordou este xoves lanzar a primeira das 30 actuacións previstas na nova Estratexia do Polo Aeroespacial de Galicia 2021-2025: a licitación para seleccionar as empresas tractoras que desenvolverán programas conxuntos de I+D durante o próximos cinco anos.
O Goberno galego destina 40 millóns a esta medida e espera poder mobilizar achegas adicionais grazas á colaboración público-privada, tanto a través da atracción de fondos europeos como da participación do sector privado.
O obxectivo da convocatoria é atraer entre 4 e 8 empresas tractoras, dar resposta aos "grandes retos tecnolóxicos aéreos non tripulados" --espérase impulsar ao redor de 80 proxectos de I+D-- e crear emprego desde o coñecemento no ecosistema de Rozas.
A Xunta remarca que se pretende "consolidar a pegada industrial" do polo, coa incorporación de máis pemes ás cadeas de valor das grandes empresas tractoras do sector aeroespacial. As empresas desenvolverán solucións que dean resposta á transformación ecolóxica e dixital e ao reto demográfico impulsando servizos públicos --sostén a Xunta-- "máis eficientes", ademais de "mellorar a competitividade do tecido produtivo e de crear emprego cualificado.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.