Xunta e BNG, xuntos na homenaxe a Castelao
O secretario xeral de Política Lingüística, o voceiro do BNG ou a deputada nacionalista Ana Pontón coincidiron nun acto da Fundación Castelao.
Por Galicia Confidencial | Compostela | 07/01/2014 | Actualizada ás 20:50
A Consellería de Cultura, Educación e Ordenación Universitaria, a través do secretario xeral de Política Lingüística, Valentín García, participou este martes no acto cultural e ofrenda floral organizado pola Fundación Castelao con motivo do 64 Aniversario do pasamento de Alfonso Daniel Rodríguez Castelao.
No mesmo acto tamén participou o BNG a través do seu voceiro nacional, Xavier Vence; a deputada Ana Pontón ou o secretario xeral da UPG, Néstor Rego.
A homenaxe celebrada no Panteón de Galegos Ilustres, onde repousan os restos do ilustre intelectual, artista e político rianxeiro, consistiu nunha ofrenda floral. Foron Valentín García, en nome da Xunta de Galicia, e presidente da Fundación Castelao, Carlos Mella Villar, en nome da institución que dirixe, os encargados de depositar un ramo de flores.
As intervencións musicais correron a cargo do "gaiteiro nubeiro", Raúl Galego, así como coa participación dos músicos Mini e Mero. Rematou coa interpretación do Himno Galego por parte dos asistentes na igrexa de Bonaval.
A última intervención foi a do presidente da fundación que avogou por "mirar a realidade de Galicia" como o facía Castelao, "desde o amor á súa lingua e á súa terra", insistiu.
