Ourense participa no ensaio clínico da vacina de ARNm para previr recaídas de cancro colorrectal
Busca o deseño de vacinas personalizadas e de precisión para estimular a inmunidade de pacientes de alto risco e evitar recaídas.
Por Europa Press / Redacción | SANTIAGO DE COMPOSTELA | 30/08/2021 | Actualizada ás 14:48
O Servizo de Oncoloxía da área Sanitaria de Ourense, Verín e O Barco de Valdeorras participa na fase II do ensaio clínico da vacina para previr recaídas de cancro colorrectal, un proxecto que desenvolve BioNTech coa tecnoloxía de ARN mensaxeiro que se empregou por primeira vez na vacina contra a covid-19.
O obxectivo deste estudo, no que xa participan pacientes ourensáns, é buscar unha terapia inmunolóxica de precisión que permita conseguir unha vacina personalizada para cada paciente. Neste caso, aqueles nos que tras unha proba altamente específica --biopsia líquida-- se determine o risco de recaída.
Conforme lembra a área Sanitaria de Ourense nun comunicado, o cancro colorrectal, tras ser operado nos dous primeiros estadios --II de alto risco e III--, recibe quimioterapia para evitar que o tumor recaia. No entanto, a oncóloga do Hospital Universitario de Ourense e responsable do ensaio clínico, Ana Fernández Montes, explica que, "no subgrupo no que se detecta ADN tumoral circulante en sangue, existe un alto risco de que o tumor recaia a pesar de recibir quimioterapia".
Ademais, Fernández Montes sinala que a quimioterapia non é sempre eficaz neste pequeno subgrupo de pacientes, nos que ata agora a única opción é extremar a vixilancia e control, polo que centran os esforzos na investigación. "Unha das vías de investigación de vangarda neste momento é o deseño de vacinas ARN, que neste caso veñen da man da empresa BioNTech", sinala.
Os pacientes son seleccionados en función do risco de recidiva do tumor, que se determina antes de iniciar o tratamento de quimioterapia mediante unha biopsia líquida --para o que só é necesario unha mostra de sangue-- que "de ser positiva, en función das mutacións que teña o tumor de cada paciente, servirá para deseñar unha vacina específica para cada enfermo", explica Montes.
PARTICIPACIÓN GALEGA
A área Sanitaria de Ourense sinalou que xa son 14 os pacientes ourensáns os que participan no ensaio clínico, e as previsións son chegar aos 40. Neste aspecto, Ana Fernández Montes destaca o compromiso e colaboración dos pacientes de Ourense e agradece a súa dispoñibilidade a participar, o que permite ao Servizo de Oncoloxía manter unha intensa actividade investigación, e converten ao hospital público de Ourense nun potencial candidato a colaborar en proxectos desta entidade.
Dos 13 hospitais que participan no ensaio en España, tres son galegos, sumándose ao de Ourense os de Santiago e A Coruña, que tamén forman parte do grupo integrado polo Clinic, Val d'Hebron e Santa Creu i Sant Pau, de Barcelona; os hospitais da Paz, San Carlos e Gregorio Marañón de Madrid; a Clínica Universitaria de Navarra, o Hospital Xeral de Valencia, o Miguel Servet de Zaragoza ou o Centro Integral Oncolóxico Clara Campal (CIOCC) de Madrid.
