Protección Civil de Santiago doará 180 quilos de material técnico aos seus compañeiros da illa da Palma

Protección Civil de Santiago de Compostela enviará nas próximas horas a La Palma unha doazón de 14 caixas con 180 quilos de material técnico destinado aos compañeiros da illa canaria.

Segundo informou o Concello de Santiago, entre ese material inclúense chaquetas de traballo, máscaras ou botas. Destaca que a solicitude de colaboración chegou a través da Asociación Nacional de Agrupacións e Asociacións de Voluntarios de Protección Civil de España.

Así, indica que foi a través dunha comunicación na que sinalan que, nas localidades máis afectadas pola erupción do volcán Cumbre Vieja, teñen "bastantes necesidades de material técnico" para o desenvolvemento do seu labor.

A axuda desde Compostela componse de 20 pares de botas de seguridade, 15 pares de katiuskas, 50 pantalóns de traballo, 15 pantalóns de auga, 15 chaquetas de traballo, 25 camiseiros de traballo, 100 camisetas, 10 pares de tenis de seguridade, 100 máscaras de tea, 10 mantas, cinco toallas e distintos produtos de hixiene.