A Valedora do Pobo asina un acordo contra a pobreza en Galicia
Farao coa Rede contra a pobreza e a exclusión social (EAPN-Galicia).
Por E.P. | SANTIAGO DE COMPOSTELA | 17/10/2021 | Actualizada ás 12:06
Con motivo do Día internacional contra a pobreza, que se conmemora este domingo 17 de outubro, a Valedora do Pobo asinará coa Rede contra a pobreza e a exclusión social (EAPN-Galicia) un acordo para desenvolver iniciativas de colaboración e intercambiar información para loitar contra as desigualdades.
A firma do acordo terá lugar este luns, ás 10,30, na sede da defensoría galega. Así, será rubricado o protocolo de colaboración entre a Valedora do Pobo e EAPN-Galicia no que o principal compromiso é "facilitar información" á Valedora das necesidades destas entidades e das persoas co fin de "facilitar o encontro de solucións ás persoas máis desfavorecidas".
No acto público, tamén se lerán as conclusións do Encontro de Participación e, especificamente, abordaranse as cuestións de vivenda, dada a preocupación enorme que hai en todas as entidades". Así, tras unha presentación da valedora do Pobo, Dolores Fernández Galiño, seguiralle a presidenta de EAPN, Eloína Ingerto. A continuación leranse as conclusións do encontro, no que ademais de vivenda, abordouse a fenda dixital e a exclusión financeira. Tamén está previsto un encontro específico con persoas afectadas das entidades e técnicos con coñecemento dos temas. Este acto será de traballo interno, non aberto a medios.
