Prospeccións en Padrón revelan "indicios da existencia e localización" onde terían arribado os resto do apóstolo Santiago

Os resultados da segunda prospección arqueolóxica levada a cabo pola Asociación Cultural Vila Petroni para estudar o subsolo do antigo meandro do río Sar, ao seu paso pola Barca, cuxo traballo de campo se realizou os días 28 e 29 de setembro, revelan "indicios da existencia e localización" do primeiro Portus Apostoli, o que podería "consolidar definitivamente" a teoría pola que se iniciaron estes traballos.

Os autores da investigación cren ter atopadao as pezas do quebracabezas que faltaban: o humilladeiro ao que fan referencia as fontes documentais e a mítica rocha onde, segundo a tradición xacobea, os discípulos do apóstolo Santiago colocaron o seu corpo ao arribar á vila coruñesa.

A prospección con xeorradar 3D e 2D e os dous perfís de tomografía eléctrica efectuados o pasado mes de setembro veñen completar o estudo xeofísico realizado en abril de 2018. Na zona prospectada hai tres anos, correspondente a un 25% da totalidade do meandro do río Sar, localizouse unha estrutura que os investigadores identificaron, pola súa morfoloxía e dimensións, como "indicios" das escaleiras do século XV ou XVI que daban acceso ao meandro e sinaladas na documentación histórica como o punto onde amarrou a barca cos restos do Apóstolo á súa chegada a Galicia desde Terra Santa.

Agora, o equipo de Andrés Bonilla, o arqueólogo que dirixe o proxecto, completou a prospección ampliando a zona de estudo e identificou a posición do antigo meandro do río Sar e do areal adxacente, así como tamén unha serie de anomalías, unha das cales "podería corresponderse" co obxecto de estudo desta segunda prospección, é dicir, "a pedra na cal se depositou o corpo do Apóstolo Santiago á súa chegada a Padrón e que se converteu en lugar de peregrinaxe".

Os responsables da investigación indican que se trata dun indicio de aproximadamente 1,9 metros cadrados de superficie e morfoloxía rectangular que podería asociarse a unha pedra enterrada a 1,5 metros de profundidade depositada no antigo leito do río, preto da estrutura graduada localizada na primeira prospección.

"Identificouse unha anomalía cuxa morfoloxía e tamaño correspóndese coas particularidades da pedra buscada", confirma Andrés Bonilla.

OBXECTO RECTANGULAR

As imaxes do estudo xeofísico revelan a presenza dun obxecto rectangular ao que lle falta unha esquina, o que alimenta a crenza dos arqueólogos e historiadores implicados no proxecto de que podería corresponderse coa rohca buscada, "xa que varias pinturas do século XVI representan o corpo do apóstolo xacendo sobre unha pena con esa mesma forma e mellada por unha esquina".

Outra das anomalías detectadas podería corresponderse, segundo os responsables da investigación, co humilladeiro que describen distintas fontes documentais sobre o Portus Apostoli, pois o estudo xeofísico localizou unha estrutura rectangular de 2x2 m2 situada á beira das escaleiras e orientada cara á pena.

Bonilla destaca, ademais, que "ambas as anomalías, as que se poderían corresponder coa pedra e co humilladeiro, localizáronse fóra do antigo meandro e do areeiro, nas zonas marcadas como de interese para atopar os vestixios".

"Foi unha carreira de fondo de catro anos de duración e repleta de obstáculos, pero, ao fin, puidemos localizar a mítica pedra, ademais das escaleiras e o humilladeiro a que fan referencia os documentos dos séculos XV e XVI. Todos eles vestixios arqueolóxicos de primeira orde", sinalou.

Os investigadores apuntan que corresponde agora á Administración Pública realizar o despregamento de medios necesarios para o seu exhumación e posta en valor. Deixámolo servido en bandexa de ouro", afirma Ángel Rey Castro, presidente da Asociación Cultural Vila Petroni.

Pola súa banda, Antonio Fernández Angueira, alcalde de Padrón, sostén que "a posible confirmación do achado do Portus Apostoli en Padrón tería un valor patrimonial incalculable e daría á vila a repercusión nacional e internacional que se merece dentro da tradición xacobea, sobre todo tendo en conta o marco do actual Xacobeo 21 22".