Por E.P. | PONTEVEDRA | 04/11/2021 | Actualizada ás 20:26
A nai do home duns 30 anos e veciño da Illa de Arousa que permanece desaparecido e ao que se lle relaciona cun narcovelero denunciou a súa falta este xoves na Comisaría de Policía de Vilagarcía.
Segundo confirmaron fontes consultadas por Europa Press, a partir da denuncia da muller quedou aberta a investigación para dar co paradoiro do novo. Agora será a propia policía a que decida se traslada a un xulgado o caso para que abra as dilixencias oportunas.
En concreto, a Policía Nacional puxo nos días pasados en marcha unha investigación relacionada coa falta deste mozo, ao que se lle vincula cunha operación de tráfico de drogas levada a cabo en augas do Atlántico.
Segundo confirmou a Subdelegación do Goberno en Pontevedra, esta investigación tiña por obxecto determinar se o caso debe de ser trasladado a un xulgado para que abra as dilixencias oportunas en relación a esta desaparición, que tivo lugar a finais do mes de agosto.
A principal hipótese que se manexa é que o insular, que xa estaba a ser investigado polas unidades contra o narcotráfico, participase como lancheiro nunha operación de transporte de droga con destino a Galicia, momento a partir do cal desaparecería por diferentes razóns.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.