Denuncian a Naturgy pola suposta talla de árbores centenarias nas Pontes

A asociación Arco Iris presentou este venres unha denuncia contra a empresa eléctrica Naturgy ante a Fiscalía de Medio Ambiente por unha suposta talla "ilegal" de árbores autóctonas centenarias no concello das Pontes, na Coruña.

Os feitos rexistráronse hai tan só uns días, segundo traslada a asociación, nunha parcela particular situada na parroquia de Bermui, no lugar de Castroverde.

Supostamente, unha empresa contratada por Naturgy entrou na devandita parcela para tallar a matarrasa diversas árbores centenarias "sen ningún tipo de permiso ou coñecemento dos seus lexítimos propietarios".

Os feitos denunciados constan en atestados da Garda Civil e Policía Municipal. Segundo a información facilitada pola asociación, os operarios que acudiron á leira tiñan ordes de tallar árbores cunha marxe de oito metros a cada lado do cableado e deixaron de facelo ante as queixas da propietaria.

Arco Iris advirte que a zona afectada "está considerada de protección rural polo propio Concello" e que entre as especies talladas hai salgueiros, castiñeiros e carballos centenarios.

Así mesmo, asegura que a actuación da empresa "vulnera varios artigos do Código Penal e atenta contra o patrimonio natural".

TAREFAS DE MANTEMENTO

Pola súa banda, fontes de Naturgy trasladan que este tipo de tarefas enmárcanse nos labores habituais e normais de mantemento das liñas de distribución eléctricas, "traballos necesarios para o óptimo funcionamento da rede de distribución, así como para a prevención e defensa contra os incendios forestais".

Así mesmo, defenden que UFD, a distribuidora eléctrica de Naturgy, realiza as operacións de xestión de biomasa en cumprimento da Lei 12/2012 de montes de Galicia e conforme ao indicado na súa disposición final primeira, pola que se modifica a Lei 3/2007 de prevención e defensa contra os incendios forestais de Galicia.

"Segundo a normativa vixente, nas liñas de distribución de enerxía eléctrica deberá xestionarse a biomasa nunha franxa de 5 metros desde a proxección dos condutores eléctricos máis externos", resolven.