As ambulancias asistenciais realizaron máis de 11.000 servizos desde outubro de 2019
No ano 2020, o número de servizos realizados foi de 4.876 e no ano 2021, un total de 5.420, os restantes 888 correspóndense ao exercicio da súa posta en marcha.
Por E.P. | SANTIAGO DE COMPOSTELA | 17/12/2021 | Actualizada ás 17:47
O conselleiro de Sanidade, Julio García Comesaña, acudiu este venres a coñecer as novas ambulancias asistenciais de soporte vital avanzado, unha dotación do 061 que, desde outubro de 2019, realizou 11.184 servizos.
Estivo acompañado do xerente do Sergas, José Flores (que foi no seu día responsable do 061), e pola directora do 061 de Galicia, Adriana Regueira, nun acto no que subliñou o labor deste recurso asistnecial que comezaron a prestar servizo nas cidades da Coruña, Pontevedra e Vigo en outubro de 2019 e en Santiago en decembro dese mesmo ano. En total, son 24 profesionais os que conforman estas catro bases.
No ano 2020, o número de servizos realizados foi de 4.876 e no ano 2021, un total de 5.420, os restantes 888 correspóndense ao exercicio da súa posta en marcha. Isto supón un amedia diaria de 13,4 servizos en 2020, que se incrementaron ata os 16,2 este ano, datos que destacou o conselleiro na súa intervención ante os medios.
Máis do 96 por cento das asistencias foron resoltas desenvolvendo autónomamente as súas competencias profesionais, é dicir, sen necesidade de mobilizar outros recursos asistenciais medicalizados, segundo o estudo realizado, como sería o médico de atención primaria ou unha ambulancia SVA medicalizada.
Dos 11.184 servizos asistidos por estas ambulancias, 2.833 asistencias resolvéronse no punto sen necesidade de trasladar e continuar a atención dos pacientes nun centro sanitario. No ano 2020, os servizos solucionados no punto foron 1.250, mentres que no ano 2021 incrementáronse ata os 1.388.
CAPACIDADE RESOLUTIVA
Con este dato, destacou o conselleiro, demóstrase a "capacidade resolutivo destes recursos asistenciais, que evitan derivacións innecesarias ata outros centros sanitarios" e contribúen a "optimizar" a ocupación dos servizos de urxencias hospitalarias.
No que se refire a as patoloxías máis asistidas, Comesaña explicou que foron a alteración da consciencia (2.084 asistencias), as caídas (1.641), os mareos (1.608), a sensación de falta de aire ou fatiga (1.238), a dor (1.007) e os accidentes de tráfico (611).
Estas ambulancias están coordinadas polo persoal facultativo da Central de Coordinación do 061 de Galicia e, explican, permiten "mellorar a calidade asistencial e os tempos de asistencia dos pacientes nos seus domicilios".
HISTORIA CLÍNICA
Comesaña tamén avanzou que, en próximos días, está prevista a implementación da adaptación da historia clínica informática ás competencias do persoal de enfermaría das ambulancias asistenciais, o que repercutirá no desenvolvemento profesionais e nunha mellora da calidade asistencial.
O conselleiro destacou que se continuará coa "potenciación" da enfermaría de atención primaria, co fin de que "se asuman competencias máis amplas, especialmente no referente á saúde comunitaria, na xestión da demanda e, por suposto, na atención aos pacientes crónicos, fráxiles e vulnerables".
