A 'volta ao cole' producirase finalmente nas datas previstas e será totalmente presencial

O Goberno anunciou este martes un acordo por "unanimidade" coas comunidades autónomas para que a 'volta ao cole' tras as vacacións de Nadal se produza nas datas previstas, para o 10 de xaneiro, e que sexa totalmente presencial.

Así o confirmou a ministra de Sanidade, Carolina Darias, na rolda de prensa posterior á reunión conxunta mantida cos ministros de Educación, Pilar Alegría, e Universidades, Joan Subirats, na que se abordou a continuación das clases no segundo trimestre deste curso 2021-2022 cos conselleiros de materia educativa e universitaria das autonomías.

Polo tanto, tamén a volta ás aulas en Galicia será o vindeiro luns, día 10 de xaneiro, de forma presencial. A Xunta indica, por outro lado, que os menores de 12 anos que sexan contactos estreitos dun caso positivo en covid-19 deberán facer corentena ao non contar aínda este colectivo coa pauta completa de vacinación; é dicir, que afectará a todos os rapaces independentemente de que recibiran ou non o preparado.

Así o avanzou este martes o conselleiro de Sanidade, Julio García Comesaña, nunha rolda de prensa ofrecida tras participar de forma telemática na reunión extraordinaria do Consello Interterritorial do Sistema Nacional de Saúde (CISNS) celebrada xunto á Conferencia Sectorial de Educación e a Conferencia Xeral de Política Universitaria.

Na súa intervención, o conselleiro ratificou que a volta aos colexios terá lugar o día 10 de forma presencial pero mostrou a súa preocupación polos "cambios" na "vixilancia e xestión" dos casos positivos dos nenos. A este respecto, precisou que os maiores de 12 anos que dean positivo nunha proba PCR ou nun autotest "deberán illarse". Do mesmo xeito que a poboación adulta, todos os contactos estreitos que non estean vacinados deberán facer corentena durante sete días.

LIÑAS COMPARTIDAS CO GOBERNO

Os apuntamentos da Xunta van paralelos aos do Goberno central. A ministra Darias xa apuntou previamente a aposta conxunta pola "presencialidade de todo o noso alumnado a partir do próximo 10 de xaneiro en todo o territorio nacional", sinalou. Segundo recalcou, houbo "unanimidade" entre as rexións e o Goberno para acordar a volta ás aulas de maneira presencial e nas datas previstas.

Durante as últimas semanas, tras o incremento de contaxios pola variante Ómicron, albiscouse a posibilidade de que o regreso ás aulas se atrasase e que a actividade docente se reiniciase de forma telemática ou semipresencial, pero tanto o Goberno, como as autonomías e a comunidade educativa no seu conxunto demandaban a máxima normalidade nos centros educativos. Algo que finalmente se produciu.

Segundo afirmou a ministra de Sanidade, garantirase a ventilación cruzada; o uso de máscaras; a apertura de todos os centros educativos e a máxima presencialidade a partir do 10 de xaneiro; intensificarase a comunicación e difusión a toda a comunidade educativa sobre as medidas de prevención; reforzarase a vacinación infantil; e reforzarase o cumprimento de todos os protocolos nos centros universitarios e residencias.

CAMBIAR AS CORENTENAS

Con todo, o Ministerio de Sanidade non descartou este martes eliminar as corentenas nos centros educativos e recoñeceu que se estudará a medida, ao mesmo tempo que descartou que os test de antíxenos se vendan nos supermercados, como ocorre en países como Alemaña ou Portugal.

Así o manifestou a ministra Carolina Darias na rolda de prensa posterior á reunión conxunta mantida cos ministros de Educación, Pilar Alegría, e Universidades, Joan Subirats, na que se abordou a continuación das clases no segundo trimestre deste curso 2021-2022 cos conselleiros de materia educativa e universitaria das autonomías.

Algúns conselleiros das comunidades autónomas si que expuxeron a posibilidade de reducir as corentenas, tal e como ocorre na poboación adulta ao pasar de dez días a sete, pero Darias remitiuse á proposta do relatorio do Sistema Nacional de Alerta Precoz e Resposta Rápida (SIAPR) e defendeu que a posición do Goberno é "ir da man da evidencia científica". "Imos esperar pero xa temos protocolos xerais que son aplicables. As corentenas fóronse modificando e temos que estar atentos á evidencia que se xere. O importante é camiñar xuntos de maneira coordinada", sostivo.

EDUCACIÓN DESTACA O BO FUNCIONAMENTO DO PROTOCOLO GALEGO

Por outro lado, preguntado polas peticións de ANPAS para reducir o cociente de alumnos por clase para evitar contaxios, o secretario xeral técnico da Consellería de Educación, Manuel Vila, destacou que os protocolos actualmente vixentes "basicamente son os que se executaron con éxito no curso 2020/2021".

"Sempre dixemos que todos os recursos materiais e humanos que se necesitasen nos centros estarían", sinalou para asegurar que "hai máis profesorado que no curso 20219/2020" e que Galicia "ten o cociente máis baixo de profesorado/alumnado xunto con Estremadura".

"As medidas organizativas, as medidas de recursos materiais funcionaron o curso pasado, están funcionado este curso", sinalou para incidir na necesidade de manter a vixilancia para que "haxa máscaras, ventilación cruzada e distancia". "Sabemos que o protocolo funciona e os centros sempre foron parte da solución, nunca un problema", apuntou.

Ademais, sinalou que malia a porcentaxe de nenos aínda sen vacinar, os centros sempre "mantiveron uns niveis de afectación na media moi por baixo do que se podería esperar".