Samuel Lago toma posesión como novo alcalde de Cambados

Samuel Lago Ozón converteuse este sábado no novo alcalde de Cambados, nun pleno extraordinario celebrado ao mediodía, no que o candidato do PSdeG obtivo 9 dos 17 votos dos concelleiros que compoñen a corporación. A favor da súa candidatura votaron, ademais do seu propio grupo, os dous edís de Somos Cambados e os dous do BNG. En contra situáronse en Partido Popular e o único concelleiro de Cambados Pode.

Samuel Lago substitúe na Alcaldía a Fátima Abal, quen o pasado sábado 8 anunciou que renunciaba ao cargo por razóns de saúde, aínda que permanecerá na corporación como concelleira. Tras tomar posesión do bastón de mando, o novo rexedor cambadés sinalou que afronta esta nova etapa con toda a ilusión coa que se afrontan os grandes retos. "Con moitas ganas de facer o mellor para a veciñanza. Motivado e, honestamente, considero que tamén preparado", indicou.

"TRABALLADOR DE MANEIRA INCANSABLE"

Lago manifestou tamén o seu compromiso de "traballar de maneira incansable" para conseguir as maiores metas, para gobernar para todas as persoas, "escoitar a todo o mundo que teña algo que dicirme e axudar a quen o precise", antepoñendo sempre o interese xeral sobre o particular e os intereses de Cambados sobre os de calquera partido. "Sempre coa máxima honestidade, humildade e diálogo", engadiu. O novo rexedor avanzou que este vai ser un goberno "progresista, galeguista e feminista". "E tamén transparente, social e sustentable", apostilou.

Tamén avanzou o novo alcalde cambadés algúns dos proxectos nos que vai focalizar a súa xestión. Entre eles destacou a execución da nova praza de abastos, a construción do novo cuartel da Garda Civil e a reforma da fachada litoral da ribeira de Fefiñáns. Engadiu que ademais destes grandes proxectos, "imos concentrar esforzos en dotar a toda a poboación dos servizos máis básicos e elementais, como son accesos dignos ás súas vivendas, o abastecemento de auga e unha rede de saneamento".

Outras das tarefas que subliñou o novo rexedor foron a conservación e mantemento dos centros escolares, os investimentos en reformas e equipamentos para instalacións deportivas e parques, e as reformas de prazas públicas como as de Fefiñáns, A Xuventude e San Gregorio. "O turismo, a viticultura, a horticultura, a pesca, a acuicultura e as industrias de transformación destes produtos contarán co noso apoio para servir como locomotoras na recuperación económica", engadiu Lago.

FESTA DO ALBARIÑO

No terreo da igualdade e a loita contra a violencia de xénero, o novo rexedor asegurou que o seu goberno manterá e potenciará as políticas activas de concienciación e de prevención. Así mesmo, expúxose como obxectivo lograr que o resto das administracións colaboren e se impliquen no desenvolvemento de proxectos estratéxicos e na captación de fondos europeos. E, por suposto, concluíu, "imos recuperar a grandiosidade da festa do Albariño en canto a pandemia o permita".

Samuel Lago, novo alcalde de Cambados, en substitución de Fátima Abal | Fonte: Europa Press