Este é o novo vídeo das Tanxugueiras con Rayden en plena polémica polas votacións no Benidorm Fest

Tanxugueiras presentou Averno, o seu novo sinxelo, este venres 28 de xaneiro. O tema, que formará parte do seu novo disco, é a primeira colaboración que Sabela Maneiro, Aida Tarrío e Olaia Maneiro gravan co rapeiro madrileño Rayden, con quen participan esta semana na primeira edición do Benidorm Fest. Un festival en plena polémica polas votacións do xurado que quixo escluír ás galegas da final.

Averno nace como unha declaración de intencións respecto a un sentimento común: a raiba. A expresión e liberación da mesma é o eixe que vertebra unha canción na que, como é habitual no repertorio das Tanxugueiras, parte da tradición para outorgar ás sonoridades urbanas un especial protagonismo; ademais de conxugar lírica de creación propia e popular. 

O tema, editado por PlayPlan Cultural e Calaverita Records, publicarouse na medianoite do venres 28 nas principais plataformas dixitais acompañado dun videoclip dirixido por Trece Amarillo, e que supón a creación audiovisual máis cinematográfica das presentadas até o momento polas cantareiras.