Os celtas poderían ter a súa orixe en Andalucía
Así o cre o director do Instituto de Estudos Celtas que asegura que da cultura tartessa pasou a Galicia e de aí a Irlanda, Inglaterra e Escocia.
Por Galicia Confidencial | Avila | 29/04/2014 | Actualizada ás 10:30
A lingua celta non chegou á Península desde as Illas Británicas, nin tampouco fixo a viaxe inversa desde Galicia, como cren algúns expertos. Un novo estudo asegura que a lingua celta orixinouse na actual Andalucía, entre a zona de Huelva, Sevilla e Cádiz, onde esta asentada a civilización tartessa.
Esa, cando menos, é a nova teoría do director do Instituto de Estudos Celtas, Ramón Sainero, que foi presentada no VII Congreso Transfronteirizo de Estudos Celtas España-Portugal, celebrado en Ávila. Unha teoría que, ademais, está collendo certo pulo entre certos sectores académicos.
E é que lembran que recentes estudos de expertos das universidades de Oxford e Gales sinalan que as linguas celtas primitivas do occidente atlántico atópanse na Península Ibérica, e non en Centroeuropa, para reforzar esta idea. Pero a Península Ibérica é moi grande, e tanto pode ser o norte dela, coma o sur.
A teoría de Ramón Sainero
Sen embargo, Ramón Sainero, que acaba de publicar o libro "La huella celta en España e Irlanda", destaca que hai evidencias históricas, lingüísticas e literarias para situar a orixe do alfabeto hispano primitivo de Tartessos cos signos rúnicos usados nas Illas Británicas e en Centro Europa. Segundo explica o autor nun medio de Huelva, "con este estudo, se se considera válido, podemos chegar á sorprendentemente conclusión de que os signos de escritura usados na primitiva rexión hispano-lusa de Tartessos, de aproximadamente o século VII a. C., son iguais ou moi parecidos ás runas que coñecemos en Europa a partir do século I d. C.".
O director do IEC di que, posteriormente, esta língua e o seu pobo trasladouse a Galicia, e de alí, ao resto dos países celtas. E, para sustentar a súa teoría lembra que Heródoto, no século V. a. C. di na súa Historia que os celtas máis antigos existían á beira do pobo dos cinetes na zona de Tartessos. "Polos estudos históricos realizados por diferentes especialistas sabemos que este pobo dos 'celtici' da zona de Tartessos posteriormente emigrou e fundo un asentamento na zona sur de Galicia e tamén sabemos polos primitivos manuscritos irlandeses -Os Anais de Clonmacnoise e O Libro das Invasións-, que os asentamentos dos escotos, máis tarde coñecidos como habitantes de Irlanda e Escocia, asentáronse na zona de Tartessos, onde se multiplicaron e crearon un asentamento para posteriormente establecer un reino na zona de Galicia e despois invadir e conquistar Irlanda", apunta.
O celta actual
O celta falado e escrito nas Illas Británicas e na Bretaña, no Occidente Atlántico, é o mellor conservado e existe en diferentes dialectos falados e escritos até hoxe en día. Pero, para este experto, "hai formas de escritura na zona sur de Iberia, tartésica e ibérica, algunhas anteriores ao século VII a. C., coas que máis tarde se escribirían os textos celta hispanos. É unha época na que as Illas Británicas e os territorios centro europeos non posuían unha cultura escrita".
Ramón Sainero é, ademais de director do Instituto de Estudos Celtas, representante español no Consello de Dirección do Centro Internacional de Estudos Celtas (CIEC), e foi profesor agregado e profesor titular durante os últimos 37 anos na Universidade Nacional de Educación a Distancia (UNED).
