USC, UVigo e UC3M desenvolven un programa contra o acoso sexual para alumnos de ESO
Por E.P. | Santiago de Compostela | 31/01/2022 | Actualizada ás 19:24
As investigadoras universitarias Patricia Alonso (Santiago de Compostela), Yolanda Rodríguez (Vigo) e Alba Adá (Carlos III de Madrid) presentaron este luns un programa de prevención do acoso sexual, tanto 'en liña' como 'offline', destinado a alumnos de entre 12 e 16 anos, é dicir, que cursen Educación Secundaria Obrigatoria (ESO).
Desenvólvese no marco do proxecto 'O acoso sexual a través dos comentarios sobre o corpo nas relacións interpersoais (IgualaMÁS)', financiado pola convocatoria 'Retos' de 2019 do Ministerio de Ciencia e Innovación.
Segundo explican as autoras da publicación, o acoso sexual é un problema que "afecta o benestar de gran parte da sociedade, especialmente das mulleres e doutros colectivos que transgreden as normas de xénero". Ademais, nos últimos anos estas actitudes trasladáronse a Internet.
No marco desta investigación, apuntan que tanto os mozos como as mozas están a asumir "o dobre rol de vítima e de agresor", pero cun matiz: as mulleres "tenden a identificarse máis controladoras no espazo virtual", mentres os homes son "máis perpetradores do acoso sexual 'offline', cara a cara'". Por iso, o seu programa pretende previr todas estas actitudes, sexan a través de redes sociais ou non.
