Formoso ve na construción das fragatas F-110 a creación de valor engadido en Ferrolterra
Formoso desprazouse ata Madrid para recibir unha explicación ao detalle da planificación e programación dos traballos previstos para a construción das naves, que darán emprego a ao redor de 8.000 persoas nos próximos 12 anos.
Por E.P. | SANTIAGO DE COMPOSTELA | 29/03/2022 | Actualizada ás 19:29
O secretario xeral do PSdeG, Valentín González Formoso, destacou o interese de Navantia por que a construción das cinco fragatas F-110 nos estaleiros de Ferrol repercutan na xeración de valor engadido na comarca.
Así o destacou PSdeG nun comunicado remitido aos medios, no que informa de que Formoso mantivo unha reunión este martes en Madrid co presidente de Navantia, Ricardo Domínguez, na que tamén participou o secretario de Organización do PSOE, Santos Cerdán.
Conforme sinalaron os socialistas galegos, Formoso desprazouse ata Madrid para recibir unha explicación ao detalle da planificación e programación dos traballos previstos para a construción das naves, que darán emprego a ao redor de 8.000 persoas nos próximos 12 anos.
O líder do PSdeG trasladou ao responsable de Navantia a reclamación de que o contrato redunde na creación de valor engadido na comarca de Ferrol, e que "vaia máis aló de cortar chapa", ao permitir facer da cidade "un polo de referencia das novas tecnoloxías aplicadas a un modelo de industria propio do século XXI".
Así mesmo, sinalou o máximo interese de que outras compañías tecnolóxicas con responsabilidades no programa repliquen o modelo de Siemens de desenvolver en primeiro lugar os modelos dixitais dos prototipos obxectivo.
Ademais, constatou o interese do PSdeG para que Navantia aproveite o desenvolvemento do contrato das fragatas para facer realidade a construción dun novo dique para o estaleiro, que permitiría incrementar a eficiencia das instalacións, asegurando carga de traballo para as próximas décadas.
