O PSdeG culpa a Xunta de "perder o legado patrimonial" da Casa de Galicia en Montevideo
Apunta a Rueda como responsable da desaparición da institución mentres está "máis preocupado por herdar a leira".
Por E.P. | Santiago de Compostela | 01/04/2022 | Actualizada ás 15:14
O secretario de Organización do PSdeG, José Manuel Lage, sinalou ao vicepresidente primeiro da Xunta e conselleiro de Presidencia, Xustiza e Turismo, Alfonso Rueda, como responsable de "perder o legado patrimonial" da Casa de Galicia en Montevideo (Uruguai) mentres está centrado en "ver se herda a leira" e "completamente ausente dos asuntos de máxima relevancia", como o peche desta institución.
O dirixente socialista criticou que Alfonso Rueda "desatenda" a función de goberno pola súa preocupación por situarse como sucesor de Feijóo.
"A conclusión", indicou, é que "primeiro perderon a Casa de Galicia de Buenos Aires, e agora 105 anos de patrimonio, de legado cultural dos galegos e galegas en Uruguai, a cuarta comunidade galega no mundo, tíranse, abandónanse e non se fai absolutamente nada por preservar o seu patrimonio".
Ademais, avanzou que a súa formación presentará unha batería de iniciativas na Cámara galega para que a Xunta responda con "urxencia" e dea "explicacións" e, se é necesario, "asuma as responsabilidades correspondentes".
Para o dirixente socialista, este feito simboliza o "fin de etapa" que vive o PP galego. "Ninguén imaxina que un goberno de Fraga ou Touriño deixase morrer un legado cultural como o que tiñamos en Uruguai", asegurou.
