Otorrinos de Pontevedra operan por primeira vez co robot cirúrxico Da Vinci
A alta precisión de movementos reduce o risco de complicacións, explican fontes sanitarias.
Por Europa Press / Redacción | PONTEVEDRA | 08/04/2022 | Actualizada ás 15:50
Profesionais do Servizo de Otorrinolaringoloxía do Complexo Hospitalario Universitario de Pontevedra realizaron no Hospital Montecelo a súa primeira intervención cirúrxica coa técnica de cirurxía robótica transoral --para boca e garganta-- a través do robot cirúrxico Da Vinci.
Segundo informou a área Sanitaria de Pontevedra e O Salnés, a operación foi coordinada polo xefe dese servizo, o doutor Ismael Arán González, que contou cun equipo de cirurxía robótica composto por otorrinolaringólogos, enfermaría e anestesistas para intervir un caso de cancro de colon.
Así, a través dunha consola que permite aumentar ata dez veces o tamaño da imaxe, os doutores guiaron o robot Da Vinci que, destacan as mesmas fontes sanitarias, "grazas á súa capacidade e alta precisión de movementos, permitiu unha intervención que tamén reduce o risco de complicacións".
O doutor Arán destacou que esta tecnoloxía "é moi intuitiva, pero require unha formación previa", dado que, abunda, "permite determinadas abordaxes, ángulos e movementos que nas cirurxías por vía laparoscópica presentarían unha maior limitación".
