Abanca promete ter “alma de caixa”

Abanca, como informou GC este domingo, é a nova denominación da entidade resultante da fusión das caixas galegas. O Grupo Banesco lanzou a marca este xoves nunha cerimonia en Santiago.

Varios centos empresarios, políticos e persoeiros foron invitados ao acto no auditorio que a entidade ten na zona vella da capital do país. O obxectivo do evento era claro: pasar páxina da convulsa etapa da nacionalización e o escándalo das preferentes e presentarse como un entidade transparente, con "sentido común" e, sobre todo, disposta a financiar a recuperación económica de familias e das empresas.

O conselleiro delegado, Francisco Botas, debullou os plans económicos. O directivo advertiu que a entidade vai facer un esforzo en dar créditos a compañías, pero non ten intención de investir en accións. De feito, deu a entender que poden vender as participacións que aínda lle quedan do tempo das caixas -por exemplo aínda conserva unha pequena parte da operadora R-. Iso si, puntualizou que “non imos desenvestir dun xeito apresurado”.

O énfase está na concesión de créditos. De feito, unha das frases que usou Botas para despedirse foi “espero que os créditos flúan rápidamente”. Botas tamén destacou que a entidade superou a recesión. Entre os datos que desvelou figura un beneficio de 44 millóns até maio, cando o previsto inicialmente para todo o ano eran só 14 millóns.

A nivel de imaxe, está claro que Banesco aposta por reforzar a galeguidade. Pode verse en aspectos como o nome da entidade e o idioma usado nalgúns intres da presentación. Aínda que a maioría foi en español, tanto Botas como Juan Carlos Escotet esforzáronse tamén en empregar o idioma propio do país.

“Queremos facer este proxecto dende Galicia, orientados ao cliente e baseado nun equipo galego con alta profesionalización”, sinalou Francisco Botas. O directivo insistiu en que os estudios que fixeran sobre o mercado galego demandaban unha entidade próxima e que soubese recoñecer os seus erros, un “banco con alma de caixa” en definitva.

“Hoxe é o gran día. Hoxe nace Abanca, un banco para Galicia, o banco dos galegos, o banco galego no mundo”. Con estas palabras o vicepresidente desta entidade, Juan Carlos Escotet, anunciaba oficialmente a nova marca comercial da primeira entidade financeira galega. Tras desevelar o novo logotipo (claramente inspirado na bandeira de Galicia), o venezolano Escotet, máximo responsábel do Grupo Banesco, comezou a súa intervención dicindo que “prometo que a vindeira vez falarei un pouquiño máis de galego”.

Curiosamente, os aplausos que levantou esta referencia a cultura do país foron bastante tímidos entre o público. Ao evento acudiron, entre outros, o presidente da Xunta, a presidenta do Parlamento, o delegado do Goberno e o presidente do Consejo de Estado, Romay Beccaría.

Escotet admitiu que lograr que Banesco opere fóra de Venezuela significa cumprir un soño personal e familiar. O obxectivo inmediato do banco pasa por convertirse en líder no norte de España. Segundo os seus datos, o 70% dos clientes bancarios do país traballaba con Novagalicia quen, a pesar dos problemas destes anos, era a entidade número 65 en Europa por volume.

Abanca presume de ser arestora unha das institucións financeiras máis solventes do Estado. A entidade recibiu máis de 9.000 millóns de axudas públicas directas estes anos. Banesco comprou a nacionalizada Novagalicia Banco por pouco máis de 1.000 millóns.

Pola súa banda, o presidente da Xunta destacou este novo banco é o resultado final de entidades de aforro que naceron “en e para o noso país, e conserva as raíces no noso país”. Feijóo  expresa o desexo de que "este bautismo prometedor se traduza nun impulso decidido ao desenvolvemento".

O acto foi presentado pola xornalista da TVG Tati Moyano.