O delegado do Goberno afirma que a construción das fragatas F-110 "xa está a xerar emprego" en Ferrol
Segundo José Miñones, Ferrol "é a cidade na que máis descendeu o paro".
Por E.P. | SANTIAGO DE COMPOSTELA | 06/05/2022 | Actualizada ás 20:10
O delegado do Goberno en Galicia, José Miñones, asegurou en Ferrol que o proxecto de construción das fragatas F-110 para a Armada española en Navantia xa se está deixando notar nas cifras de emprego . "É a cidade na que máis descendeu o paro", sinalou o representante do Executivo central na Comunidade galega, que visitou o estaleiro un mes despois do corte de chapa que inaugurou os traballos.
Alí, Miñones sinalou que o último informe de paro rexistrado que elabora o SEPE reflicte unha redución do número de inscritos en 172 persoas. Con todo, manifestou que estes datos "son só o principio" dos efectos dun investimento "histórico" de 4.320 millóns (máis de 5.000 na comarca se se inclúen outras actuacións).
Avanzou que durante este ano se pasará do centenar de traballadores do naval que están implicados na fabricación da primeira fragata aos 600. "Durante todo o desenvolvemento do proxecto alcanzaranse os 9.000 empregos", lembrou.
Miñones tamén quixo destacar o investimento en formación que asume Navantia (tres millóns de euros) e na modernización das súas instalacións e procesos. "Trátase de transformar o estaleiro e neste proceso a fábrica dixital de bloques que se vai a construír estará ao máximo nivel de excelencia internacional, dixitalizada e robotizada", apuntou. "Todo isto permitirá situar máis se cabe a nivel internacional a Navantia e que o resto do mundo mire cara a Galicia e cara a este estaleiro", incidiu.
FÁBRICA DE BLOQUES
A futura fábrica de bloques centrou boa parte dun acto que contou coa presenza do director de Navantia Ferrol, Eduardo Dobarro, e do alcalde da cidade, Ángel Mato, entre outros. Dobarro apuntou que esta instalación será "o último en tecnoloxía" e lembrou que o proceso comeza "coa chapa recentemente chegada e acaba coa fabricación do bloque totalmente terminado, incluíndo o pintado.
No medio está todo o proceso de dixitalización e robotización do estaleiro". Sobre os prazos para que sexa unha realidade, o director do estaleiro indicou que "ao longo deste ano teremos a fábrica preparada para empezar" a cuxa implantación os Orzamentos Xerais do Estado destinan 100 millóns.
