O TSXG anula unha nova comisión de servizo no Concello da Coruña
A CIG acusa ao concello de utilizar este sistema "para premiar a persoas afíns ou castigar a determinado persoal que non é do seu gusto".
Por Europa Press / Redacción | A CORUÑA | 11/05/2022 | Actualizada ás 11:02
O Tribunal Superior de Xustiza de Galicia (TSXG) anulou unha nova comisión de servizo no Concello da Coruña, neste caso na Xefatura de Infraestruturas, segundo informa a CIG.
Nun comunicado, lembra que no mes de abril foi o Xulgado do Contencioso-administrativo número 4 o que anulou outras tres comisións de servizo, neste caso na área de Servizos Sociais. "Por falta de transparencia nos criterios de avaliación", apunta.
Sobre a decisión do alto tribunal galego, sinala que o fai "ao entender que esta praza tiña que incluírse na convocatoria do concurso ordinario de méritos para a súa cobertura mediante este procedemento".
Para a CIG, esta nova resolución xudicial evidencia "o uso que está a facer o goberno municipal da Coruña coas comisións de servizo, como un sistema para premiar a persoas afíns ou castigar a determinado persoal que non é do seu gusto". Tras estes fallos, insta o goberno municipal a "cambiar" a súa política laboral e "respectar a legalidade".
