O PSdeG insta a Goberno central e Xunta a garantir que instalacións continúen en zona de dominio público marítimo

O secretario xeral do PSdeG, Valentín González Formoso mostrou este luns en Cambados o apoio dos socialistas galegos aos afectados polo informe de Costas que pon data de caducidade á permanencia dalgunhas instalacións en zona de dominio público marítimo e instou o Goberno do Estado e a Xunta a buscar solucións entre as dúas administracións.

Neste sentido, pediulles que "non se pasen a pelota" e que "non confronten politicamente" porque así, engadiu, "prexudican os que quedan no medio, que son os traballadores do mar".

Este luns, Formoso mantivo un encontro co alcalde de Cambados, Samuel Lago, e representantes do sector afectados por este informe de Costas aos que lles trasladou o apoio e o compromiso do PSdeG.

O líder dos socialistas galegos asegurou estar "tranquilo" tras manter conversas coa Dirección Xeral de Costas e coa ministra de Transición Ecolóxica pero, matizou, estarán "máis tranquilos" cando conteste por escrito ao sector directamente.

Así, emprazou os afectados a solicitar un informe ao Ministerio para que fixe un criterio e unhas condicións claras baixo as que este tipo de instalacións poidan permanecer en zona de dominio público marítimo terrestre. Con isto, subliñou, "a seguridade xurídica estaría garantida" e daríase "tranquilidade" ao sector.

Nesta mesma liña, o alcalde de Cambados, Samuel Lago, defendeu que "non ten sentido" que este tipo de industria estea noutro sitio.