Rosario Álvarez, reelixida presidenta do Consello da Cultura Galega

O Plenario do Consello da Cultura Galega (CCG) reelixiu este xoves a Rosario Álvarez (Pontevedra, 1952) presidenta. A súa candidatura foi a única presentada e afronta agora o que será o seu segundo e último mandato.

Segundo traslada o CCG, a presidenta enfróntase ao novo período "con renovado impulso" e a intención de manter "os seus sinais de identidade: xestión participativa, procura de novos públicos, cohesión do tecido cultural galego e colaboración con todo tipo de entidades, así como a promoción exterior da cultura galega".

O Plenario validou o proxecto presentado por Rosario Álvarez, que manifestou o seu desexo de continuar cunha dirección non presidencialista senón marcada por unha xestión participativa que contribúa a activar a implicación dos membros do Plenario xunto cos das Seccións, Comisións e Arquivos.

Na súa intervención, a presidenta electa incidiu na relevancia de fortalecer internamente a institución e reforzar a cohesión do sistema, procurando unha interlocución fluída con axentes culturais de diverso tipo.

Ademais, apelou a ofrecer espazos de confluencia para toda a sociedade nos que "compartir reflexións, inquietudes, balances, propostas de futuro, problemas e solucións, formación e divulgación de novo coñecemento", sempre ao redor da cultura galega.

Rosario Álvarez comparecerá como presidenta electa no Parlamento de Galicia e o seu nomeamento será efectuado polo Consello da Xunta de Galicia e posteriormente publicado no Diario Oficial de Galicia (DOG).

Tras a súa incorporación oficial, o Pleno do Consello da Cultura Galega elixirá os membros da nova Comisión Executiva a proposta da presidenta.