217 colectivos manifestaranse este domingo en Santiago por "unha alternativa" aos eólicos

Únense á coordinadora da plataforma 'Eólica Así Non' para manifestarse no Día Mundial do Medio Ambiente e reclamar un "modelo enerxético xusto e sustentable".

Por Europa Press / Redacción | Santiago de Compostela | 04/06/2022 | Actualizada ás 19:56

Comparte esta noticia

Un total de 217 colectivos e entidades uníronse á coordinadora da plataforma 'Eólica Así Non' para manifestarse este domingo, 5 de xuño, coincidindo co Día Mundial do Medio Ambiente, en Santiago, en demanda de "unha alternativa enerxética" aos eólicos e a favor das fontes de enerxía renovables, pero "a través dun modelo enerxético de implantación xusto e sustentable".

Cartel manifestación da plataforma 'Eólica Así Non' o 5 de xuño de 2022 en Santiago de Compostela.. 'EÓLICA ASÍ NON'
Cartel manifestación da plataforma 'Eólica Así Non' o 5 de xuño de 2022 en Santiago de Compostela.. 'EÓLICA ASÍ NON' | Fonte: Europa Press

A organización pide tamén "unha alternativa enerxética" concibida para "dar servizo ao pobo e ao interese público e no que teña cabida o autoconsumo e outras formas de produción alleas ao oligopolio enerxético".

Entre as entidades adheridas a esta plataforma atópanse organizacións ecoloxistas, veciñais, culturais, sociais, sindicais e políticas, que este domingo sairán ás rúas de Santiago de Compostela para defender nove principios sobre os que, ao seu xuízo, se debe construír a alternativa enerxética de Galicia.

Neste sentido, defenden a protección da natureza; a preservación dos caladoiros de pesca e corredores ecolóxicos mariños; o coidado do patrimonio; a compatibilidade coa soberanía alimentaria; o aforro e eficiencia enerxética "antes que o aumento da xeración"; soberanía sobre os recursos fronte ao "espolio enerxético"; planificación enerxética "con fins socioambientais e ao servizo do país"; participación pública activa; e preservación da saúde pública.

Segundo trasladou a plataforma organizadora, a marcha comezará ás 12,00 horas na Alameda de Santiago e rematará na Praza do Obradoiro.

Neste punto, está prevista a lectura do manifesto 'Temos alternativa!' a cargo dunha representación das diferentes plataformas adheridas. O acto estará conducido pola actriz Isabel Risco e o contacontos Lois Pérez, acompañados dun grupo de música tradicional.

Con esta manifestación, a organización pretende "dar visibilidade ao gran rexeitamento social de Galicia" ao actual modelo enerxético e á "necesidade imperiosa de buscar unha alternativa máis xusta e sustentable".

Así mesmo, informou de que algunhas das plataformas veciñais e concellos porán un servizo gratuíto de autobuses para aquelas persoas que queiran acudir a Santiago a manifestarse. En concreto, poderán facer uso destes servizos aquelas persoas ou colectivos que procedan do Morrazo, Betanzos, Oza-Cesuras, Curtis, Mesía, Ferrolterra-Ortegal, A Baña, A Pastoriza, Meira e Lugo.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta