O Consello da Cultura Galega e a Xunta crean un foro para analizar a situación do colectivo LGTBI en Galicia
"É necesario recoñecer que as actitudes e condutas homofóbicas e transfóbicas están profundamente arraigadas na nosa sociedade", afirma Lorenzana.
Por Europa Press / Redacción | SANTIAGO DE COMPOSTELA | 06/06/2022 | Actualizada ás 17:32
O Consello da Cultura Galega (CCG) e a Consellería de Promoción do Emprego e Igualdade presentaron este luns a creación do 'Foro Identidade e Disidencias Sexuais', que busca a actualización da información sobre as necesidades das persoas LGBTI en Galicia.
A conselleira de Promoción do Emprego e Igualdade, María Jesús Lorenzana, destacou que o foro, que nace durante o mes da celebración do Orgullo LGTBI, permitirá "previr" as condutas violentas contra o colectivo. "O obxectivo é lograr unha sociedade en igualdade de condicións e oportunidades para todas as persoas", aseverou.
A presidenta do CCG, Rosario Álvarez, expuxo que o foro pretende ser un "espazo de diálogo e debate" no que colaborará unha mostra representativa de sectores implicados na educación, investigación ou divulgación sobre a identidade sexual.
Para a xestión desta iniciativa, o CCG constituíu unha Comisión Técnica Temporal coordinada por Carme Adán e integrada pola concelleira de Compostela Aberta Marta Lois; o investigador da Universidade de Santiago de Compostela Enrique Latorre, e a activista feminista Daniela Fernández.
"FALTAN DATOS"
Durante a presentación do foro, Adán explicou que o tema se abordará "desde diferentes bloques temáticos de interese" nos que se explorarán as demandas identificadas do colectivo, así como os "posibles retos" das políticas públicas nesta materia. "O certo é que a día de hoxe nos faltan datos para coñecer a situación actual do colectivo LGBTQI en Galicia", sinalou a coordinadora.
Por iso, o obxectivo último do foro é a elaboración dun informe onde plasmar a situación da poboación galega pertencente ao colectivo, segundo indicou a coordinadora do proxecto, que incluirá información sobre participación pública, educación, ámbito laboral e violencias, entre outros temas.
Nesta liña, Lorenzana recalcou a importancia coñecer "en profundidade" a situación actual, coa identificación das necesidades fundamentais do colectivo para poder mellorar como sociedade. "É necesario recoñecer que as actitudes e condutas homofóbicas e transfóbicas están profundamente arraigadas na nosa sociedade", afirmou a conselleira.
CALENDARIO DE ACCIÓNS
O traballo da Comisión Técnica organizarase ao redor de cinco alicerces principais. Por unha banda, o primeiro encontro centrarase na participación pública e celebrarase o 6 de xullo, mércores, nas inmediacións do CCG no Pazo de Raxoi (Santiago de Compostela).
O segundo encontro desenvolverase no mes de setembro, e centrarase en temas de seguridade, educación e sanidade; mentres que o terceiro encontro --no mes de novembro-- tratará os asuntos laborais, territorio, servizos sociais e 'edadismo'.
Pola súa banda, o cuarto encontro consistirá nunha mesa de pensamento, cultura, memoria viva e diversidade sexual, en xaneiro de 2023. Un mes máis tarde levarase a cabo o último encontro, centrado na violencia sufrida polo colectivo LGBTI.
De todos os xeitos, estas non son as únicas accións programadas neste convenio, posto que na presentación do Foro a Comisión anunciou a inauguración, o próximo 13 de xuño, no IES Rosalía de Castro, en Santiago de Compostela, dunha exposición divulgativa sobre a evolución histórica do movemento LGBTIQ+.
O Foro concluirá o próximo ano coa presentación dos resultados e dunha guía práctica que "axudará a orientar" actuacións e con medidas para lograr a igualdade das persoas LGBTI de Galicia.
