A prisión un holandés por extorsionar unha nena coruñesa á que esixía fotos e vídeos sexuais

A Policía Nacional detivo e enviou a prisión un home de 28 anos, residente en Países Baixos, por extorsionar unha nena de 13 anos da Coruña a través de redes sociais e Whatsapp para facerse con fotos de contido sexual. A investigación iniciouse en 2019, tras a denuncia da nai nas dependencias do Grupo de Investigación Tecnolóxica da Brigada Provincial de Policía Xudicial da Coruña.

A muller, recolle a Policía, notara unha actitude estraña na súa filla de 13 anos, en relación co uso que facía do seu teléfono persoal, xa que pasara de estar permanentemente pendente del a deixalo apagado nunha caixa.

Por iso, examinou o contido do terminal, podendo comprobar como, a través da aplicación WhatsApp, a súa filla fora vítima de ameazas e coaccións por parte doutro usuario. Na aplicación gardaba aínda as conversas nas que a súa filla era extorsionada para que enviase vídeos de contido sexual, chegando a enviar polo menos seis vídeos deste tipo.

Os investigadores comprobaron que a menor contactara cun usuario da rede social Instagram, o cal se facía pasar por un menor. Desa rede social pasaron a comunicarse a través de WhatsApp, onde a menor lle enviou ao suposto menor unha fotografía persoal de contido sexual.

Unha vez que este home dispuxo deste contido, revelou a súa verdadeira identidade e comezou a ameazar á menor con revelar a fotografía aos seus familiares e amigos se non lle enviaba máis contido do mesmo tipo. Ademais disto, logrou convencer a menor de que infectara o seu teléfono cun software malicioso que lle permitía acceder a todo o almacenado nel.

Durante días obrigou a súa vítima a remitirlle vídeos de carácter sexual, previa descrición do que quería que ela fixese, impóndolle duración mínima de cada vídeo e horas concretas do día para envialos. Todo iso, dirixíndose á menor con insultos, vexacións, humillacións e utilizando unha linguaxe agresiva.

Cando esta nena non puido soportar máis a presión, bloqueou os números de teléfono do seu agresor na aplicación WhatsApp, pero este conseguiu contactar con ela de novo utilizando a aplicación. Ademais da través de WhatsApp, o autor tentaba acceder á menor mediante mensaxes de Instagram, chamadas telefónicas e mesmo SMS.

O Grupo de Investigación Tecnolóxica da Coruña realizou unha complexa e minuciosa investigación, utilizando tamén as canles de colaboración policial internacional de Interpol, o que permitiu identificar plenamente o autor dos feitos en 2020. Tratábase dun home de 28 anos de idade residente nos Países Baixos e con antecedentes policiais en ambos os países por diversos delitos contra as persoas.

O resultado da investigación foi posto en coñecemento do xulgado competente, que instruíu o caso. Co impulso do procedemento por parte do Fiscal Delegado de Criminalidade Informática da Coruña, e utilizando unha Orde Europea de Detención e entrega, logrouse a detención do home en 2021, así como o seu traslado a España, onde foi ingresado en prisión á espera de xuízo.

Hai unhas semanas celebrouse o xuízo oral na Audiencia Provincial da Coruña, onde foi declarado autor dos feitos e condenado a once anos e medio de prisión, como autor dun delito de captación e utilización de menores para elaborar material pornográfico infantil, ademais dun delito continuado de agresión sexual. Ademais da pena de prisión, impúxoselle unha inhabilitación especial para calquera profesión que leve contacto regular con menores.