Pontevedra terá máis de mil efectivos contra o lume este verán

O delegado territorial da Xunta en Pontevedra, Luís López, informou de que o operativo de loita contra o lume na provincia contará 1.188 efectivos, 98 vehículos --entre os que figuran catro helicópteros--, dez puntos de vixilancia fixa, 1.180 puntos de recollida de auga e 26 cámaras de videocontrol nas 13 localizacións máis conflitivas e estratéxicas. Ademais, expón que se investiron 5 millóns de euros en accións de prevención tradicionais, como cortalumes, devasa, pistas forestais ou franxas secundarias, entre outras.

O edificio administrativo da Xunta en Pontevedra acolleu este mércores a reunión do Comité Provincial de Coordinación Policial contra os Incendios Forestais 2022, que abordou o plan operativo nesta materia, baixo a presidencia dos delegados territoriais de Pontevedra e Vigo, Luís López e Marta Fernández-Tapias.

Ao encontro tamén asistiron representantes da Subdelegación do Goberno, Policía Nacional, Garda Civil, Servizo de Protección da Natureza (Seprona), exército de terra, a Policía Autonómica, servizos provinciais de Emerxencias e Medio Rural e os responsables de distritos forestais, entre outros.

Así, López indica que aos 1.200 efectivos e cen vehículos que se despregarán por toda a provincia este verán engádese "un operativo de seguridade e vixilancia transversal e de primeira orde", coa participación de todas as forzas e corpos de seguridade.

A reunión deste martes serviu para deixar "completamente engrasado" todo este operativo "tras varias semanas de traballos previos de coordinación", sinala Luís López.

A partir deste venres, 1 de xullo, comeza a época de alto risco de incendios forestais. Ñas Policías Autonómica e Nacional, a Garda Civil e o Exército despregaranse de maneira planificada por toda a provincia de Pontevedra para realizar labores de vixilancia, prevención e control fronte aos lumes.

Segundo quedou establecido, a Policía Nacional, coa colaboración do corpo autonómico, encargarase da vixilancia nesta materia nos municipios de Pontevedra, Marín, Vigo e Vilagarcía de Arousa, mentres que a Policía Autonómica terá presenza en ata 27 municipios para estas tarefas con axentes en Lalín, Silleda e a comarca do Salnés, entre outros.

Os restantes 34 concellos da provincia de Pontevedra corresponderanlle á Garda Civil, aínda que no caso do nove municipios das comarcas do Condado e A Paradanta, que é a contorna máis complexa da provincia nesta materia, haberá un importante reforzo con patrullas terrestres do Ministerio de Defensa.

Nesta ocasión determináronse como zonas de especial vixilancia, tras un exhaustivo estudo previo, as parroquias de Ventosa (Agolada), Dozón (Dozón), Mouretán (Arbo), Tortoreos (As Neves), Godóns (Covelo), Filgueira (Crecente), Guillade e Moreira (Ponteareas), o municipio de Salvaterra, Torneiros (O Porriño), San Xurxo (Salceda de Caselas), Goián (Tomiño), Xesta e Xende (A Lama), Corredoira (Cerdedo-Cotobade) e o monte Xiabre, limítrofe entre Caldas de Reis, Catoira e Vilagarcía de Arousa.

O edificio administrativo da Xunta en Pontevedra acolle a reunión do Comité Provincial de Coordinación Policial contra os Incendios Forestais 2022.. XUNTA | Fonte: Europa Press