A Coruña pide a Xunta e Goberno central medidas para evitar a deslocalización da atención telefónica en Naturgy

O pleno da Coruña trasladou, co apoio de todos os grupos -- PSOE, PP, BNG, a Marea Atlántica e tamén da concelleira non adscrita Isabel Faraldo, de Podemos-- o apoio aos traballadores de Teleperformance pola deslocalización do servizo que presta esta empresa para Unión Fenosa Distribución, do grupo Naturgy.

Os membros da corporación municipal expresaron este apoio a través dunha declaración institucional, á que deu lectura a alcaldesa, Inés Rey, e tamén co voto a favor de todos os grupos a senllas mocións, presentadas pola edil Isabel Faraldo, e polo BNG, respectivamente.

Nelas, apóianse as demandas dos traballadores e rexéitase o traslado do "80% do servizo" a Colombia, coa perda de postos de traballo e de calidade no servizo, segundo recollen as mocións. Tamén se pide á empresa que "reconsidere" a súa decisión. Así mesmo, demándanse medidas a Goberno central e Xunta.

En concreto, o BNG, segundo lembrou o seu portavoz, Francisco Jorquera, reclama cambios normativos para evitar a deslocalización destes servizos. Tamén incidiu, como o edil da Marea Atlántica, Alberto Lema, nos beneficios da empresa en Galicia.

O portavoz do grupo municipal socialista, José Manuel Lage, reprochou a Naturgy que non teña "responsabilidade social" pese ao "arraigamento histórico" con Galicia, pero tamén instou á Xunta a implicarse neste asunto por ser "a competente en política industrial". Desta forma, respondeu as críticas feitas desde o PP ao Goberno central.