O Concello de Ferrol segue sen abrir cinco comedores sénior que pecharon pola pandemia

O portavoz do grupo municipal do Partido Popular no Concello de Ferrol, José Manuel Rei Varela, demandou ao goberno municipal desta cidade a reapertura do cinco comedores sénior cos que contaba antes da pandemia e que foron clausurados polas medidas restritivas instauradas naqueles momentos.

"Este servizo de comedores favorece a integración social das persoas maiores, ofrece unha alimentación equilibrada e favorece tamén algo que é moi importante tras a pandemia, a interacción social", detallou o portavoz municipal do PP ante as instalacións do Centro municipal de maiores da rúa Río Xuvia, onde coincidiu con algúns dos usuarios deste servizo ata o ano 2020.

"A pandemia encerrounos nas nosas casas e hai que devolver a socialización e, por iso, non entendemos que, tanto tempo despois, e tras a reapertura da maior parte dos servizos públicos, o Concello de Ferrol teña pechados o cinco comedores de persoas maiores que tiñamos no noso municipio", explicou Rei Varela.

O popular detallou que Ferrol foi "unha cidade pioneira na posta en marcha deste servizo, que ten como obxectivo facilitar un menú saudable e equilibrado, acorde ás necesidades nutricionais do usuario", sobre todo, nunha cidade cunha elevada taxa de poboación maior de 65 anos.

MOCIÓN

O portavoz popular asegurou que o seu grupo está "cansado das escusas deste goberno para non reabrir os comedores para maiores, a pesar da demanda existente que tratan de ocultar". "Primeiro foi a pandemia, daquela os habituais problemas de xestión dos servizos municipais e agora que non hai demanda. Si que a hai, aínda que haxa menos usuarios, a administración debe cumprir co obxectivo de prestar o servizo", razoou.

Ante esta situación, Rei Varela anunciou que o seu grupo presentará unha moción ao pleno de fin de mes na que solicitarán que se reabran cinco os comedores sénior: San Pablo-Catabois, Caranza, Río Xubia, Esteiro e Canido.