A Cámara demanda un rexistro centralizado para facilitar a familiares de falecidos a xestión das súas contas bancarias
Expoñen que o Ministerio de Xustiza asuma a creación e mantemento deste rexistro, que "complementaría" os do certificado de defunción, últimas vontades e os contratos de cobertura de seguros de falecemento.
Por Europa Press / Redacción | SANTIAGO DE COMPOSTELA | 06/10/2022 | Actualizada ás 18:59
A Cámara autonómica demandou por unanimidade a creación dun rexistro centralizado a nivel estatal para facilitar a obtención da titularidade das contas, saldos e posicións bancarias de persoas falecidas. A iniciativa, levada á Comisión 1ª Institucional, de Administración Xeral, Xustiza e Interior do Parlamento de Galicia este xoves polo Grupo Popular, contou co respaldo de todos os grupos.
Así, o Lexislativo reclama a habilitación deste rexistro para facilitar aos familiares ou achegados de falecidos a obtención da titularidade de contas, saldos e posicións bancarias a nome destas persoas. A iniciativa aprobada subliña a necesidade de que este rexistro conte coas cautelas "que esixa a lexislación vixente", especialmente en materia de protección de datos.
"Consideramos necesario habilitar un procedemento sinxelo para que aquela persoa que acredite interese lexítimo poida obter un certificado no que se indique o nome das entidades financeiras onde o falecido posúe contas, valores ou préstamos", sinalou a deputada popular Felisa Rodríguez durante a defensa da proposición.
Neste sentido, os populares expoñen que o Ministerio de Xustiza asuma a creación e mantemento deste rexistro, que "complementaría" os do certificado de defunción, últimas vontades e os contratos de cobertura de seguros de falecemento.
Doutra banda, a Comisión 1ª tamén aprobou por unanimidade outra iniciativa dos populares que insta á Xunta a manter "unha estreita colaboración e cooperación" coas asociacións que tratan problemas de adicción ao xogo.
