O Sergas recorda que só sanitarios, maiores de 60 anos e pacientes de risco deben pedir cita para a cuarta dose contra a covid
Os equipos de Enfermaría situados nos puntos de vacinación masiva preguntarán ás persoas que acudan se pertencen ou non a estes grupos.
Por Europa Press / Redacción | Santiago de Compostela | 14/11/2022 | Actualizada ás 14:21
O Servizo Galego de Saúde (Sergas) lembra a toda a cidadanía que a autocita para recibir a cuarta dose da vacina contra a covid-19 vai dirixida a grupos específicos, entre eles maiores de 60 anos, traballadores sanitarios e pacientes con enfermidades crónicas.
E é que, aínda que o Sergas abriu o pasado venres o sistema de pedir cita co obxectivo de que estes colectivos recibisen o segundo reforzo a partir deste luns, o certo é que calquera persoa pode acceder ao sistema tanto a través da web do servizo sanitario como da aplicación 'Sergas Móbil'.
Neste contexto, os equipos de Enfermaría situados nos puntos de vacinación masiva preguntarán ás persoas que acudan se pertencen ou non a estes grupos, tal e como informa a Consellería de Sanidade. Ata o momento, solicitaron vez para recibir a cuarta dose un total de 2.156 persoas.
En concreto, a campaña de autocita vai destinada a colectivos que, por un motivo ou outro, aínda non recibisen este segundo reforzo. Está dirixida a persoas de 60 a 79 anos; profesionais sanitarios; menores de 60 con enfermidades cardiovasculares, neurolóxicas e respiratorias; pacientes de 12 a 59 con patoloxías de risco; mulleres embarazadas; e persoas convivientes con outras de alto grao de inmunodepresión.
