As visitas á mostra 'AI: More than Human' crecen un 60 % tras o anuncio de que A Coruña acollerá a Aesia

A elección da opción galega da Coruña para acoller a Axencia Estatal de Supervisión da Intelixencia Artificial (Aesia), xerou un notable incremento do interese por coñecer máis sobre as máquinas intelixentes e a súa irrupción nas nosas vidas. A afluencia á megaexposición 'AI: More than Human', que pode verse na sede de Afundación desde o pasado setembro, aumentou un 60% tras o anuncio.

O incremento de visitantes foi especialmente notable nos días que seguiron ao 5 de decembro, data do anuncio de que a cidade será sede da AESIA. A Coruña quere saber máis sobre intelixencia artificial. Nesa semana da designación, na que houbo ademais dous festivos, o público da mostra creceu nun 90% con respecto aos datos medios de asistencia.

Nos días 6 e 8 de decembro, non laborables, a sede coruñesa de Afundación rexistrou senllas marcas de asistencia á exposición. A comparación mesmo é "moi positiva" con respecto ao festivo anterior, o 1 de novembro: un 50 % máis de visitantes, e ofrece resultados similares para días non festivos.

Este aumento no interese por aprender máis, de forma amena, sobre intelixencia artificial creceu tanto para as visitas libres como para a opción de visitas guiadas que ofrece Afundación nesta exposición. A opción de percorrer a mostra nunha visita guiada ofrece outro tipo de experiencia.