Cada galego gastou 72 euros nos décimos de Nadal, 5 euros máis que a media española
Aumentan un 5% as vendas para o sorteo de Nadal ata alcanzar os 3.180 millóns.
Por Europa Press / Redacción | MADRID | 22/12/2022 | Actualizada ás 10:09
O Sorteo Extraordinario de Nadal facturou na súa edición do ano 2022 un total de 3.180.097.520 euros, o que representa un 5 por cento máis que no de 2021, segundo datos provisionais de Lotaría e Apostas do Estado (LAE).
As vendas creceron en toda as comunidades autónomas, aínda que o incremento foi superior na Rioxa (+10,8%) e Baleares (+9,11%). Cataluña e Aragón, cun aumento do 3,2% e 3,6% respectivamente, e as cidades autónomas de Melilla (3,33%), foron as que rexistraron menor crecemento.
Por cifra global de facturación, é a Comunidade de Madrid a que se sitúa á cabeza con 518 millóns de euros (+4,02). En Cataluña as vendas elévanse a 394 millóns, seguida de Comunidade Valenciana con 376 millóns (5,95%), Castela e León con 252 millóns (+4,2), Galicia (194 millóns), País Vasco (164 millóns), Castela-A Mancha (150 millóns), Aragón (116 millóns), Asturias (98 millóns), Murcia (92 millóns), Estremadura (65 millóns), Baleares (50 millóns), A Rioxa (31 millóns), e Ceuta (1,4 millóns) e Melilla (1,3 millóns).
Por provincias, o maior incremento nas vendas rexistrárono As Palmas (+13,5%) e A Rioxa (+10,8%). Segovia foi, con todo, a provincia cun incremento inferior (+2,11%), xunto con Gualajara (2,16%).
GASTO MEDIO
O gasto medio por habitante no sorteo foi de 67,11 euros, con Castela e León á cabeza ao superar os 106 euros por habitante. Ao contrario, Baleares foi a comunidade onde menos se gastou (42,91 euros de media), xunto a Melilla (16,2 euros) e Ceuta (17,8 euros).
En Asturias e A Rioxa o gasto medio por habitante foi de 97 euros, Aragón de 87, en Cantabria 86 euros, Comunidade de Madrid con 76 euros, Comunidade Valenciana e País Vasco de 74 euros, en Castela-A Mancha de 73 euros, seguida de Galicia (72 euros), Estremadura e Murcia (61 euros), Navarra (57 euros), Andalucía (55,2 euros), Canarias (51 euros) e Cataluña (50,7 euros).
Por provincias, Soria lidera o gasto medio con 245 euros por persoa, seguida de Burgos (130 euros), Segovia (125 euros), Palencia (122), Huesca (116 euros) e Conca (110 euros).
O gasto máis baixo por habitante encabézano Xirona (40,2 euros), Huelva (40,8 euros), Tarragona e Sevilla (48 euros), á marxe de Melilla con 16,2 e Ceuta con 17,8 euros.
