Detido tras ser sorprendido arrastrando pola rúa unha máquina comecartos
Tamén foron detidos dous encapuchados que asaltaron unha tenda en Ourense.
Por Europa Press / Redacción | SANTIAGO DE COMPOSTELA | 10/02/2023 | Actualizada ás 11:20
Dous homes foron detidos en Ourense como responsables de asaltar encapuchados e armados con obxectos metálicos un establecemento do que levaron a máquina rexistradora tras ameazar á dependenta.
Segundo informaron as forzas da orde este venres, os feitos tiveron lugar ás 06,50 horas da mañá do pasado mércores 8 de febreiro, cando dous individuos que ocultaban o seu rostro cunha carapucha e unha bolsa de plástico na cabeza entraron nun local.
Un dos asaltantes levaba na man unha barra de ferro mentres que o outro portaba unha escofina, utensilios que empregaron para ameazar á dependenta para que lles entregase a recadación da caixa rexistradora.
Os individuos saíron á carreira do local co diñeiro e a caixa rexistradora, pero foron localizados polos axentes mobilizados tras recibir o aviso. Finalmente, os asaltantes foron interceptados tras unha persecución a pé. Ambos quedaron a disposición do xulgado de garda despois de pasar por dependencias policiais ao ser arrestados como presuntos autores dun delito de roubo con violencia.
ARRASTRABA UN COMECARTOS
Doutra banda, na madrugada do pasado xoves, un mozo de 26 anos foi detido pola Policía Local e a Policía Nacional ao ser localizado mentres arrastraba pola rúa do Vinteún, tamén en Ourense, unha máquina comecartos.
Alertados por viandantes que observaran a este individuo ao redor das 04,30 horas, os axentes desprazáronse á zona, onde conseguiron dar con este home, que se escondeu nun escampado. Ademais, a patrulla recuperou outra máquina rexistradora que, supostamente, o mozo tamén subtraeu dun establecemento de hostalaría.
