Rueda insiste en que as primas a sanitarios "son boas" e volve criticar a "politización" da protesta do domingo

O presidente da Xunta, Alfonso Rueda, defendeu, fronte ás dúbidas, que as últimas medidas adoptadas para o Servizo Galego de Saúde (Sergas) "son boas" e evidencian que o Executivo autonómico actúa "onde pode" e sen escatimar en "os recursos que merece a sanidade pública". Ao tempo, reafirmouse en que a protesta convocada por SOS Sanidade Pública para este domingo en Santiago ten "un enorme grao de politización".

Un día despois de ratificar varias medidas, entre elas a apertura dunha bolsa para facer gardas en PAC de áreas con moitas vacantes estruturais --coa de Pontevedra e O Salnés no foco--, en declaracións aos medios en Santiago, o presidente respondeu que el ten que "tomar ben" os comentarios que lle chegan "en forma construtiva, obxectiva e sen outra intencionalidade" que buscar a mellora da sanidade.

Rueda admitiu que houbo "algún matiz e algunha cousa corrixida sobre a marcha", ademais de lembrar que agora está aberto o "prazo de alegacións", pero insistiu en que "a valoración xeral é positiva". "E agradézoo porque foi e vai ser un esforzo moi importante dentro das capacidades da Xunta. Sabemos que hai un problema de falta de médicos, e creo que quedou claro que non é cuestión de non querer usar os recursos que se merece a sanidade pública", reflexionou, antes de engadir: "Onde se poidan empregar recursos económicos e solucionar os problemas, ímolo a facer".

"ENORME GRAO DE POLITIZACIÓN"

En canto á protesta convocada polo domingo pola situación da Atención Primaria, Rueda trasladou o seu "total respecto" a quen acudan á capital galega para participar na manifestación convocada por SOS Sanidade Pública co fin de "reclamar que as cousas melloren". "Pero volvo insistir, hai un enorme grao de politización, polo menos por parte dos partidos da oposición", apostilou.

Tamén o conselleiro de Sanidade da Xunta de Galicia, Julio García Comesaña, defendeu este venres que as medidas anunciadas nas últimas horas para paliar o déficit de médicos en Atención Primaria "son para executar", e desvinculounas da manifestación convocada por SOS Sanidade Pública para este domingo: "A Xunta xa se manifesta todos os días en todos os foros en favor da Sanidade Pública".

En declaracións aos medios durante unha visita ao Porriño para supervisar as obras de ampliación do centro de saúde, o conselleiro replicou a quen atribúen as melloras anunciadas a esa protesta, que se prevé multitudinaria, e dubidan da súa execución.

Respecto diso, subliñou en varias ocasións que a Xunta "se manifesta todos os días" e non só "un día ou unha semana concreta" en favor da Sanidade Pública, e que unha forma de manifestarse é falar cos profesionais e implementar medidas de mellora, como as anunciadas nas últimas horas.

FORMOSO

Pola súa banda, o secretario xeral do PSdeG, Valentín González Formoso, tachou de "parches" as últimas medidas anunciadas no ámbito da Atención Primaria polo Goberno galego ante os problemas existentes. "Rueda está a pór parches", dixo o líder dos socialistas galegos, para quen o titular do Executivo galego está "máis preocupado" pola mobilización do domingo en Santiago de Compostela convocada en defensa da sanidade pública.

Da mesma, mostrouse convencido de que será "multitudinaria". "Hai un clamor social", asegurou respecto da situación da sanidade pública que cualificou como un "alicerce básico ao que non se vai a renunciar", expuxo aludindo á sanidade privada.

Por outra banda, aseverou que "non se trata de ocorrencias" ao cualificar como tal medidas como "dar casa de vacacións a un médico en Sanxenxo ou a agora facer máis horas e pagarlles máis". "Non é tema de diñeiro, é un tema de recursos, incentivar que o mundo sanitario galego teña unha oportunidade laboral de futuro aquí".

ANA PONTÓN

Tamén a portavoz nacional do BNG, Ana Pontón, fixo un chamamento á cidadanía galega a participar na manifestación convocada pola plataforma SOS Sanidade Pública para defender o sistema sanitario público, que constitúe "a única garantía de ser iguais ante a enfermidade".

A líder frontista ofreceu unha rolda de prensa tras manter este venres no Parlamento galego un encontro con profesionais e pacientes "afectados a deterioración" da sanidade pública en Galicia, onde convidou a secundar a marcha que terá lugar este domingo nas rúas de Santiago.

"O que defendemos é a saúde, que todos sexamos iguais cando estamos enfermos", aseverou Pontón, que vaticinou que a do domingo será unha marcha "masiva" para "dicirlle ao PP que non siga xogando coa saúde dos galegos".