PSOE acusa á Xunta de renunciar a 4 millóns para danos polo lobo e o executivo galego lembra que interpuxo recurso
O directora xeral de Patrimonio Natural, Belén do Campo, incidiu en que a Xunta non votou a favor da estratexia porque entende que o Goberno central "deixou de atender" cuestións como "revisar" a anterior.
Por E.P. | SANTIAGO DE COMPOSTELA | 24/03/2023 | Actualizada ás 15:08
O deputado do PSdeG Martín Seco recriminou á Xunta que "renuncia a 4 millóns" para paliar os danos que ocasiona o lobo en Galicia pola súa postura de rexeitamento á estratexia estatal, ante o que a directora xeral de Patrimonio Natural, Belén do Campo, respondeu que o Goberno galego interpuxo recurso contencioso administrativo contra a decisión "sen precedentes" e "unilateral", que "deixa fóra a Galicia" na repartición de fondos.
Na comisión de agricultura do Parlamento, a directora xeral incidiu en que a Xunta non votou a favor da estratexia porque entende que o Goberno central "deixou de atender" cuestións como "revisar" a anterior e a necesidade de ter un censo "actualizado". Neste sentido, avisou de que "esta comunidade non vai aceptar chantaxes do Goberno da Nación".
Por parte do grupo socialista, Seco lamentou que a Xunta "renuncia" a ese diñeiro "por confrontar co Goberno central" e ironizou con que lle "debe sobrar o diñeiro". "Claro que non nos sobra o diñeiro", respondeu a directora xeral, para a continuación reivindicar o que o Executivo autonómico "leva investido" neste ámbito.
Así mesmo, anunciou que "nos próximos días" sacará "unha modificación da orde", xa co censo actualizado que indica que a presenza está no 92% do territorio, para que " ese incremento previsto do 30% só para concellos afectados" se harmonice a "todos" os municipios, "unificando os importes".
