Nova concentración en defensa da Sanidade para denunciar a "maquillaxe" de datos que fai a Xunta

A Plataforma SOS Sanidade Pública celebrará este mércores, 12 de abril, o Día Mundial da Atención Primaria con pequenos actos en diferentes localidades galegas, pero chama á cidadanía a participar nunha "gran mobilización social e profesional" con concentracións o próximo 26 de abril.

Segundo informa nun comunicado, estas son as principais accións que desenvolverá o colectivo no marco desta celebración fronte a unha Xunta cuxa "única estratexia", denuncia, é "desmantelar e privatizar" o primeiro nivel asistencial.

SOS Sanidade Pública lembra que a Organización Mundial da Saúde (OMS) refírese á Atención Primaria como a "pedra angular" dos sistemas sanitarios e fixa unha serie de medidas para aplicar en países de todo o mundo que a plataforma comparte.

Son propostas como "fortalecer" a Primaria, organizar os servizos de saúde "de maneira integrada" e dar "participación e capacidade de decisión" á cidadanía, entre outras que, segundo valora SOS Sanidade por mor da multitudinaria manifestación en Santiago o 12 de febreiro, contan co respaldo da poboación.

"Ningún sistema, por forte que sexa, pode sobrevivir á falta de financiamento, de persoal e de mala organización e xestión", advirte o colectivo, que denuncia que ata agora "as únicas medidas adoptadas" pola Xunta foron "meros retoques para maquillar a realidade e suprimir a obrigatoriedade da dedicación exclusiva".

Varias persoas con pancartas en defensa da sanidade pública galega, durante unha manifestación convocada para demandar 'máis recursos' para Atención Primaria | Fonte: César Argina