O Observatorio Costeiro de Galicia reinstala unha boia en Ribeira para mellorar a xestión mariña
O dispositivo conta con novos medidores de datos do medio mariño.
Por E.P. | SANTIAGO DE COMPOSTELA | 02/05/2023 | Actualizada ás 18:50
O Observatorio Costeiro de Galicia reinstalou unha boia fronte á costa de Ribeira (A Coruña), con novas tecnoloxías creadas e desenvoltas por investigadores galegos para axudar a recoller datos no medio mariño e, deste xeito, mellorar a xestión das zonas costeiras e predicir incidencias.
Segundo trasladou a Xunta nunha nota de prensa, a boia conta con novos parámetros meteorolóxicos e oceanográficos e incorpora novos sensores para optimizar a recollida de datos e ampliar unha información obtida das condicións do mar.
Este martes, a conselleira de Medio Ambiente, Territorio e Vivenda, Anxos Vázquez, e a conselleira do Mar, Rosa Quintana, visitaron a boia, situada fronte á costa do municipio coruñés de Ribeira.
Esta actualización tecnolóxica, detallou a titular de Medio Ambiente, "é de gran utilidade para desenvolver modelos de predición do estado do mar, a interpretación de fenómenos mariños, o seguimento do impacto do cambio climático na costa, apoio á xestión de recursos vivos e acción ante posibles episodios de contaminación mariña accidental".
Pola súa banda, a conselleira do Mar, Rosa Quintana, destacou o "excelente traballo" que realizan os técnicos e investigadores galegos para dotar ás administracións e ao conxunto da cidadanía dos "mellores datos".
