Por E.P. | SANTIAGO DE COMPOSTELA | 13/05/2023 | Actualizada ás 14:20
A portavoz nacional do BNG, Ana Pontón, asegurou este sábado en Ferrol que comezou "a conta atrás" para que os veciños do municipio coruñés decidan "o rumbo de cidade no próximos catro anos", convencida ademais de que van optar por un "proxecto valente, transformador para abrir un tempo novo no concello".
"Os gobernos de éxito do BNG son o aval e o mellor exemplo de como facer que unha cidade avance a ritmo rápido e en positivo", afirmou. "Estou segura de que os veciños de Ferrol darán a súa confianza ás ideas claras e con coherencia na defensa da cidade que representa Iván Rivas", engadiu.
A líder nacional sinalou ao PP e ao PSdeG na súa intervención. "Das franquías estatais xa sabemos o que podemos esperar. Son dúas caras da mesma discriminación con Ferrol. Din unha cousa cando están na oposición e fan a contraria cando chegan ao goberno. O do sector naval é un exemplo de libro. É lamentable como se intercambian os papeis con total descaro e sen porse sequera colorados", lamentou.
"O BNG representa a única opción de cambio real para este concello porque temos un gran candidato e un proxecto serio, solvente, e coa man tendida para transformar esta cidade en positivo, a favor sempre das persoas", insistiu.
EN CLAVE GALEGA
Por outra banda, Ana Pontón animou a "pensar en Galicia en grande". "O meu soño é facer realidade esa Galicia en grande como xa facemos nos concellos onde gobernamos. Teño a esperanza e o convencemento de que está máis preto que nunca facer ese soño realidade e abrir unha nova etapa na que os galegos miren ao futuro con tranquilidade e esperanza", comentou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.