Este lunxo o DOG publica a nova convocatoria de accións formativas para cualificar a 23.000 desempregados

O Diario Oficial de Galicia (DOG) publica este luns a nova convocatoria de axudas para financiar accións formativas promovidas por centros acreditados e dirixidas a mellorar a cualificación dunhas 23.000 persoas desempregadas no período 2023-2024, ás que o Goberno galego destinará 70 millóns de euros.

Segundo informa o Goberno galego nun comunicado, a convocatoria permanecerá aberta ata o próximo 22 de xuño. Busca "mellorar a cualificación dos galegos non ocupados como unha das claves para avanzar na súa inserción laboral".

As accións están dirixidas á adquisición e mellora de competencias profesionais relacionadas cos requirimentos de produtividade e competitividade das empresas e ás necesidades de adaptación aos cambios operados nos sectores produtivos.

Sinalan que a convocatoria volve apostar pola formación flexible e adaptada ás necesidades do alumnado e ábrese a persoas traballadoras por ERTE, suspensións de contratos de traballo ou con redución de xornada, así como a galegos con discapacidade física, psíquica ou sensorial.

Poderán tomar parte nestas accións, ademais, cun tope do 30% de participación, traballadores ocupados, sempre que as prazas non se cubran na súa totalidade con desempregados. Serán beneficiarios das achegas centros ou entidades de formación debidamente acreditados para impartir formación profesional para o emprego en Galicia en modalidade presencial, a distancia ou mixta.

Na fase de tramitación, a Xunta terá en conta a participación nas formacións de colectivos prioritarios como mulleres, vítimas de violencia de xénero, menores de 30 anos, desempregados de longa duración e emigrantes retornados.

Unha vez concretada a oferta, os alumnos poderán acceder a estes cursos a través das oficinas de emprego de Galicia, da páxina web: https://emprego.xunta.gal ou mediante solicitude directa ás entidades beneficiarias.

Oposicións no Recinto Feiral de Silleda. XUNTA DE GALICIA