Cabezas pide a Jácome que dimita por "saquear" a cidade de Ourense
Solicita tamén un pleno extraordinario para que se dean explicacións tras os últimos audios sobre a demolición do matadoiro.
Por Europa Press / Redacción | SANTIAGO DE COMPOSTELA | 23/05/2023 | Actualizada ás 13:01
O candidato do Partido Popular á Alcaldía de Ourense, Manuel Cabezas, compareceu este martes ante os medios de comunicación nunha convocatoria urxente tras os últimos audios dados a coñecer polo xornal 'La Región'. E denunciou o "presunto saqueo" do rexedor, Gonzalo Pérez Jácome, á vez que urxiu paralizar procedementos de contratación do Concello.
Cabezas modificou a súa axenda e puxo no foco os novos audios difundidos polo diario ourensán, que apuntan a que o alcalde recoñece adxudicar a demolición do matadoiro con sobrecusto para sacar supostamente máis comisión.
En concreto, o dirixente popular demandou "a inmediata dimisión" de Jácome (de Democracia Ourensá) e, como consecuencia, "o cesamento inmediato de todo o seu equipo de eventuais", así como "a paralización de todos os procedementos de contratación" do concello e, ademais, un pleno extraordinario para que se "dean as explicacións necesarias".
Cabezas afirmou que se está pondo "fundamentalmente en xogo a cidade e aos seus cidadáns" e que As Burgas "vive unha situación de emerxencia, unha anomalía política" na que se fala de "feitos gravísimos que están a pasar neste momento".
