Viaqua insiste en que a auga de Betanzos é apta a pesar do brote de gastroenterite
Din que as súas analíticas son normais, aínda que doutras realizadas pola Xunta non se saben os resultados.
Por Europa Press / Redacción | Santiago de Compostela | 31/05/2023 | Actualizada ás 14:07
As analíticas realizadas pola empresa concesionaria da rede de abastecemento de auga en Betanzos, onde se detectou un brote de gastroenterite, concluíron que os parámetros da mesma cumpren a normativa. Pero seguese á espera de coñecer tamén os resultados das analíticas realizadas pola Xunta, que tomou mostras en varios puntos do municipio.
"Mentres tanto, tendo en conta que se segue investigando a orixe do brote de gastroenterite e co fin de reducir ou eliminar potenciais riscos para a saúde da poboación, mantense a restrición do uso de auga de abastecemento para que non se utilice para a inxesta, lavado de alimentos nin hixiene bucodental". Ademais, indica que "non podendo descartar que a orixe estea en fontes públicas non conectadas á rede municipal, tamén se restrinxe o seu uso".
Por outra banda, indica que as analíticas realizadas polos laboratorios de Viaqua serán publicadas nas canles de comunicación do concello para coñecemento da poboación. Ademais, a nivel interno, mantivéronse reunións de traballo e coordinación para cubrir necesidades da poboación con Servizos Sociais, Protección Civil e Cruz Vermella.
Así mesmo, a esperar de poder determinar a orixe do brote, e tendo en conta a limitación do consumo de auga, iníciase a repartición de garrafas aos maiores de 75 anos que viven sós; a aqueles veciños que teñen problemas de mobilidade e a familias vulnerables. Os afectados tamén poderán porse en contacto con Servizos Sociais.
