'Mar Aberto, concertos na fin da terra' trae actuacións musicais aos faros atlánticos e ao Arsenal de Ferrol

A directora de Turismo de Galicia, Nava Castro, presentou este mércores o novo ciclo de concertos 'Mar aberto, concertos na fin da terra', que traerá actuacións musicais durante o mes de xullo ao Arsenal Militar de Ferrol e a faros atlánticos.

Na presentación participaron tamén a delegada territorial da Xunta en Ferrol, Martina Aneiros; o presidente da Autoridade Portuaria de Ferrol-San Cibrao, Francisco Barea e o director do centro de Institucións de CaixaBank, Rubén Riaño.

Segundo explicaron, este ciclo é unha continuación dos 'Concertos na Fin do Mundo', concibidos como unha experiencia musical e turística diferente no marco da celebración do Xacobeo 21-22.

Para esta edición serán catro as localizacións escollidas que teñen como referente próximo un faro da costa galega ou espazo "de beleza singular". "Son concertos de formato intimista en contornas singulares, o que os converte en eventos moi especiais, únicos", indicou Nava Castro.

O primeiro dos concertos será no Arsenal Militar de Ferrol, os próximos 7 e 8 de xullo coa actuación de Amaro Ferreiro, Julieta Venegas, Eva B e Alice Wonder, entre outros.

O fin de semana seguinte (14 e 15 de xullo) as actuacións serán o Faro Cabo Silleiro (Baiona), onde actuarán Ses, Monopolius Dop Lynn Milanés e Catua Salom.

Os días 21 e 22 de xullo en Faro Punta da Barca (Muxía) actuarán Fillas de Cassandra, Freedonia, Cora Velasco e Mísia. E xa o último fin de semana de xullo, os días 28 e 29 de xullo, actuarán en Faro de Corrubedo (Ribeira), Blanca Paloma, The Gift, Sheila Patricia e Allova. As entradas son gratuítas e pódense reservar en www.woutick.es