Santiago, "referente" para o colectivo LGTBIQ+ no Día do Orgullo
A capital acolleu o acto central desta celebración
Por Europa Press / Redacción | SANTIAGO DE COMPOSTELA | 28/06/2023 | Actualizada ás 18:53
A alcaldesa de Santiago de Compostela, Goretti San Martín, encabezou este mércores un acto na Praza do Obradoiro na celebración do Día Internacional do Orgullo LGTBI + onde os participantes leron un manifesto e despregáronse as bandeiras do colectivo sobre os balcóns do concello.
No acto participaron as concelleiras dos diferentes grupos municipais Mercedes Rosón (PSdG-PSOE), Míriam Louzao (BNG), María Baleato (PP) e María Rozas (Compostela Aberta); e un grupo de alumnos e alumnas do IES do Sar.
Este evento, foi o acto central do Día do Orgullo LGTBIQ+ na Comunidade Autónoma e iniciouse cunhas palabras de benvida da alcaldesa, que destacou "a dignidade de todas as persoas que conforman o colectivo LGBTI para lograr a sociedade tolerante, xusta e inclusiva que todas soñamos".
Na mesma liña, Sanmartín pronunciou unha mención especial "a todas as persoas que abriron camiño na loita pola visualización e dignificación do colectivo, as pioneiras que comezaron a escribir o relato en clave diversa nesta cidade, as que sementaron a semente para que hoxe podamos falar de identidade de xénero desde as perspectivas social, política e humana".
Ademais, un grupo de estudantes do IES do Sar participou do evento onde leron fragmentos que foron realizadas no marco do proxecto educativo Dei-versos, coa participación activa de toda a comunidade educativa a través da Comisión de Igualdade do propio Centro.
MANIFESTO
Por outra banda, as concelleiras que participaron do acto, leron o manifesto polo Día Internacional do Orgullo LGBTI+, data que conmemora a revolta de Stonewall que tivo lugar en Nova York en 1969. Esta cita, é considerada como o nacemento do movemento LGBTI moderno.
Na lectura do manifesto expresouse que "no ano 2023 estamos a ver como no mesmo país en que se orixinaron as revoltas volven ser aprobadas leis que regulan o tipo de roupa que pode vestir unha persoa, baixo ameaza de multa ou de cárcere. Se está a ocorrer alí, unha vez máis, pode ocorrer aquí se non actuamos".
"Períodos de avance social, melloras en liberdades e relaxación nas normas de xénero e sexuais poden verse sucedidos por períodos regresivos nos que o control dos corpos e as vidas das persoas LGBTI+ é máis restritivo e violento. Isto é o que estamos a observar na actualidade", manifestaron as concelleiras.
Na lectura realizouse un chamamento a "tomar partido, a que toda a cidadanía dea un paso á fronte e defenda os ideais de igualdade e diversidade que caracterizan nosa Compostela" e ademais reiterouse o compromiso desde o Concello para "dar o exemplo, de mostrarnos como unha barreira unánime contra o odio".
En concreto, as concelleiras comprometéronse, en nome da Corporación municipal, a desenvolver un protocolo contra as violencias machistas, LGBTIfóbicas e discriminatorias no lecer nocturno, promover unha programación cultural 'queer' aberta, apoiar o movemento asociativo, garantir un acceso igualitario de todas as persoas aos servizos públicos municipais e defender os dereitos LGBTI+.
"Santiago de Compostela é cidade de referencia para o colectivo LGBTI+, un espazo seguro, un fogar no que poder ser libres e felices. Evitar que esta realidade se poña en perigo é a nosa responsabilidade, e desde a institución municipal faremos todo o que estea nas nosas mans para protexer esta seguridade, liberdade e felicidade. Comprometémonos a cumprir con este reto", concluíu a alcaldesa no peche do acto.
CAFÉ CON ORGULLO
Por outra banda, o sindicato de Comisións Obreiras de Galicia (CCOO) celebrou este mércores un "café con orgullo" ao que acudiron delegadas e delegados sindicais de distintos puntos de Galicia.
A secretaria de Muller, Igualdade e Políticas LGTBI+ de CCOO de Galicia, Mamen Sabio, solicitou "mirar ben o que facemos porque non podemos dar un paso atrás" no que respecta aos dereitos conquistados por este colectivo.
Por este motivo, Sabio subliñou o "papel importantísimo" de CCOO para a consecución de dereitos das persoas LGTBI+, especialmente no ámbito laboral. Ademais, a sindicalista resaltou a importancia dos cambios legais , os que se realizaron e os que se están considerando, aos que valora como "insuficientes".
"Para que as leis sexan eficaces, é necesario aplicalas, levalas a efecto, o que se traduce en coñecelas, telas presentes na actividade laboral diaria para poder facer fronte a actitudes, accións, comportamentos LGBTIfóbicos de forma que non teñan cabida en ningunha esfera da vida", declarou Sabio.
